Рекьерин майишатдин работникрин йикъан вилик квай йикъара чун 32-нумрадин «Сулейман-Стальский райондин рекьериз къуллугъ авунин кархана» ОАО-дин генеральный директор Исмаилов Руслан Бадрудиновичахъ галаз гуьруьшмиш хьана, адавай са шумуд суалдиз жаваб гун тIалабна.
- Руслан Бадрудинович, сифтедай заз квез пешекарвилин югъ мубарак ийиз кIанзава. Ахпа заз вуна куь карханадин везифайрикай лагьанайтIа кIанзавай.
Мубарак авунай чухсагъул. ОАО-дихъ тайин тир са везифа авач. Чиди, винидихъ лагьайвал, акционервилин кархана я. Адахъ вичин Устав ава. Сифте нубатда чна адан бинедаллаз кIвалахзава, ана къалурнавай везифаяр кьилиз акъудиз чалишмиш жезва. Мадни, чна республикадин «Дагавтодор» обществодихъ галаз сихдаказ алакъада аваз кIвалахзава. Тамамарзавай кIвалахар чаз атай заказрилай аслу я. Абур неинки чи райондай, гьакI республикадин маса районрай ва шегьеррай къвезва. Меслятдал атана гьа кIвалахар тамамарни ийизва. Мисал яз, чна гьам шегьре, гьам хуьрерин рекьер къайда аваз хуьзва, хъуьтIуьн вахтунда тик гуьне квай рекьериз къум, кьел вегьезва, гьа чкаяр живедикай михьзава, муькъверихъ гелкъвезва, ракьун тIваларин жагъунриз ширер язава, герек чкайрал талукь знакар, шегьерризни хуьрериз фидай рекьер ва мензилдин кьадар къалурзавай щитар эцигзава ва икI мад. Са мисал гъизва: тек са алай йисуз чна 300 агъзур манатдин къиметдин знакар ва щитар эцигна.
- Аквазва, везифаяр тIимил туш. Абур кьилиз акъудун патал куь карханада шумуд касди кIвалахзава? Техника авани?
- Карханада 16 касди кIвалахзава. Коллективдикай завай анжах разивилин келимаяр лугьуз жеда. Куьгьне хьанвайбур ятIани, чахъ эксковатор, грейдер, «ЗИЛ» машин, тракторни ава. Хъсандиз кIвалахзавайбурукай яз завай рабочияр тир Гьабибов Гьамидулагьан, Амаханов Амаханан, механизатор Айдемиров Къириман тIварар кьаз жеда.
Гьелбетда, завай чи вири кIвалахар хъсанзава лугьуз жедач. Четинвилерни гьалтзава. Мисал яз, кьве йисан вилик акъатнавай Рекьерин федеральный закондин бинедаллаз са километр рехъ къайдада аваз хуьн патал 500 агъзур манат пул ахъаюн лазим я, амма ахъайзавайди анжах 36 агъзур манат я. ЯтIани, чун четинвилериз килигзавач, тапшур-мишай кIвалахар, хиве авай везифаяр кьилиз акъудиз чалишмиш жезва.
