Инсанар. Девирар. Кьисметар.

- Зун лежберар тир Багьаудин ва Зуьгьрехалум Исаеврин хзанда 1940-йисуз 7-аял яз дидедиз хьана, - башламишна ихтилат дишегьлиди. – Дах тракторист тир, дидени кIел-кхьин тийижир дишегьли.
1948-йисуз зун сифте яз партадихъ ацукьна, хуьре за 4-класс куьтягьна. Ахпа зун Дагъустандин Огнида авай дагъви рушарин «Горянка» интернатдиз кIелиз фена, гьана 9-класс куьтягьна. Духтур хьун зи рикIе авай мурад тир. Гьавиляй зун 1961-йисуз Дагъустандин медицинадин училищедик экечIна, 1964-йисуз анаг акьалтIарна.
Зегьметдин рехъ Магьарамдхуьруьн райондин Тагьирхуьруьн къазмайрал башламиш хьана. Жегьил пешекар тиртIани, зи хиве дидейринни бицекIрин сагъламвал хуьнин ва мягькемарунин жавабдар везифа туна –зун акушеркавилиз кьабулна. Гуьгъуьнилай 4 вацра за акушерка яз Самур станциядин больницада, 8 вацра ЦIийи хуьре ФАП-дин заведующийвиле кIвалахна. Са юкъуз заз гьа вахтунда райондин больницадин кьилин духтурвиле кIвалахзавай Евгения Павловнади вичин патав эверна.
- Заз вун Вини СтIалрин хуьруьн аялар хадай колхозный кIвалин (колхозный родильный дом) заведующийвиле тайинариз кIанзава, - лагьана Евгения Павловнади. – БицекIрин ва дидейрин гьакъиндай кьетIен къайгъударвал герек я.
Им жавабдар кIвалах тирди, хиве четин везифаяр гьатзавай заз чизвай. Гьавиляй за разивални гана. Им 1966-йис тир. А девирда медработникар бес жезвайди тушир. Чи хуьре авайди 2 кас тир. Чна инсанрин сагъламвални хуьзвай, халкьдин арада профилактикадин кIвалахни тухузвай, садакай масадак акатзавай азаррин вилик пад кьун патал серенжемар кьабулзавай, хуьре михьивилер хуьнал гуьзчивал тухузвай. «Красный крестдин» член язни за общественный кIвалах тухузвай, вилик эцигай тапшуругъар кьилиз акъуддай.
Гьа йисара «ЦIегьер», «ЦIаяр», «Сибирская язва», «Натуральная оспа», «Брюшной тиф» ва хаталу маса азарар пайда хьанвай. Абурун аксинани чна женг чIугвазвай.
Лап хъсан «Санбюллетень» акъудун патал районда конкурс тухунни гьа йисара адет хьанвай кар тир. 1969-йисуз за гьазурай «Санбюллетенди» районда, республикада ва гуьгъуьнилай Москвадани 1-чка кьунай.
Гьа 1966-йисалай инихъ за винистIалвийриз медицинадин рекьяй къуллугъзава.
Зи зегьметдиз гьукуматди, халкьди къиметни гана. ИкI, зун са шумудра хуьруьн, райондин Советрин депутатвиле хкяна, заз гзаф кьадар грамотаяр, 1989-йисуз «Зегьметдин ветеран» медаль гана.
Жувакай рахадайла, заз ихьтин са кардикайни лугьуз кIанзава. За 1970-йисарилай инихъ газетрихъ, иллаки жуван райондин «Куьредин хабарар» газетдихъ галаз сих алакъа хуьзва. Жегьил йисарилай шиирарни кхьизва, абур «Самур» журналдиз, «Лезги газет», «Куьредин хабарар» газетриз акъатзава...
Эхь, йикъари варцар, варцари йисар эвез ийиз, физва вахтар, идахъ галаз санал, яшарни къвез физва. Уьмуьрда 70 йисан рекьиз акъатнава зун. Адет яз, са кьадар рекьиз фейила, гьар са кас элкъвена вич фейи рекьиз килиг хъийида. Зани жуван уьмуьрдин рекьиз вил вегьезва. Жувавай жедайвал къуллугъна за халкьдиз, кIвалахдин юлдашрихъ, къуни-къуншийрихъ, хуьруьнвийрихъ галаз хатур-гьуьрмет хун тавуна яшамиш хьана. Зи уьмуьрдин макьсад гьамиша халкьдиз къуллугъ авун, намус хуьн хьайиди я, къенлай кьулухъни гьакI жеда.
Уьмуьрдин четинвилерихъни зун гъвечIи чIавалай вердиш я. Дидевални заз Худади кьисметнач. ЯтIани, зун гьада гайи йикъал рази я. Кьисмет гьахьтинди хьайила, завай вуч ийиз жеда?... 17 касди кIвалахзавай амбулаториядин коллектив зи хзан, за куьмек гана сагъламвал мягькемар хъувур аяларни жаванар зи веледар я. Халкьди ийизвай гьуьрметни заз багьа я. Атана зи гуьгьуьл къачунай, дерди-гьал хабар кьунай квезни чухсагъул.
Автордин гъвечIи алавани: эхь, четин уламар гзаф хьана мегьрибан и дишегьлидин уьмуьрда.
И имтигьанрайни ам уьзуьагъдаказ экъечIна. Мадни, Л. Исаевади уьмуьрда 46-йис баркаллу кардиз – инсанрин сагъламвал хуьниз ва мягькемаруниз бахшна, и кар давамни ийизва.
Вичин 70-йисан юбилей тебрик авуналди редакциядин коллективдиз лацу халатдал леке тагъай Л. Исаевадихъ – мегьрибан дишегьлидихъ, мухбирдихъ, шаирдихъ – мягькем сагъламвал, рикIин шадвал, бахтлувал, кIвалахдани яратмишунрин рекье мадни еке агалкьунар хьана кIанзава.