Зи яшар зи девлет я

Дуьз лагьайтIа, Гь. Гьажимисриев хьтин инсанар акурла за фикирни ийида: савадлу вири уьмуьр рикI алай пешедиз бахшна инсанди, гьуьрметлу хзан, кIвал-югъни хьанва, яшарни атана 76 йисав агакьнава, дуланажагъ, яшайишдин шартIарни пис туш, секиндиз ял ягъун патал мад вуч кIанда инсандиз?! Ваъ, Гьажибала ахьтинбурукай туш. И яшара аваз халкьдин вилик экъечIна тардай, чIагъандай макьамар ягъун, манияр лугьун, фестивалрани конкурсра иштиракун – ибур нелай хьайитIани алакьдай крар туш. Гьич тахьайтIа, ибур жегьилрин везифаяр я лагьана, кисна ацукьда гзафбур.
- Вахтанг Кикабидзеди тамамарзавай машгьур манида лугьузвайвал, зи яшар зи девлет я, - суьгьбетзава агъсакъалди. – Заз абурал «зи яшар зи ашкъи-гьевесни я» гафар алава хъийиз кIанзава.
Гь. Гьажимисриев 1934-йисуз дидедиз хьана. Аял вахтар мал-къара, лапагар хуьз акъудай ада сифте маниярни хуьруьн мублагь чуьллера лугьуз башламишна жеди. Гьа йисара ада вичи-вичиз кфил, тар, чуьнгуьр, гуьгъуьнилай чIагъанни ягъиз чирна. Къуншидаллай Хутаргърин школада кIелдайла ада Кьасумхуьрел тухвай са мярекатдал «Компартия ава чахъ» ва «Кефчибег» манияр лагьанай.
7-класс акьалтIарна, армиядин жергейра къуллугъна хтай Гьажибалади хейлин йисара Кьианрин хуьруьн библиотекадин заведующийвиле, Дербентдин культпросветучилище акьалтIарайдалай гуьгъуьниз Кьасумхуьруьн Культурадин кIвале художественный руководителвиле, директорвиле кIвалахна. И йисара Гьажибалади тешкилай гьевескаррин коллективди хуьрерин агьалийриз, майишатрин зегьметчийриз гзаф кьадар концертар гана.
Идалайни гъейри, дуст Куругъли Келбялиева далдам, Гьажибала Гьажимисриева вичи чIагъан ягъиз, гьа йисара Куьре, ЯркIи патарин гзаф хуьрера абуру мел-мехъерни гурлудаказ кьиле тухвана. Анрал Куругълидини Гьажибалади тамамариз хьайи сатирадинни юмордин «Мушмилат», «Узендай хкай паб», «Дустарин гьуьжет», «Де лагь, дуст кас, ихьтин паб жедани», «Кефчибег» ва маса манияр (абур кхьинни чпи ийизвай) гуьгъуьнилай халкьдин манийриз элкъвена, абур инсанрин сивера къени ама.
Гь. Гьажимисриева саки 15 йисуз РСФСР-дин культурадин лайихлу работник Ифрат Кьасумова тешкилай «Кьасумхуьруьн далдамчияр» ансамблдин кIвалахдани активвилелди иштиракна.
- Зи уьмуьрда лишанлу вакъиайрикай сад 1960-йисуз Москвада кьиле фейи Дагъустандин искусстводин Декадада иштиракун хьана, - лугьузва Гь. Гьажимисриева. – За Кремлдин съездрин дворецда халкьдин са шумуд мани тамамарнай. Гьа чIавуз гайи СССР-дин культурадин министерстводин Гьуьрметдин грамота ва лауреатвилин Диплом за багьа ядигарар яз хуьзва.
1980-йисалай 1985-йисалди Гь. Гьажимисриева Эминхуьруьн Культурадин кIвале художественный руководителвиле ва директорвиле кIвалахна. И йисара анаг агьалийрин рикI алай ва районда хъсан культурадин маканрикай садаз элкъвена.
Ингье, 50 йисалай виниз я Гь. Гьажимисриев райондин ва хуьруьн Культурадин кIвалерин художественный самодеятельностдин коллективрин иштиракчи яз. И йисара ада Кьасумхуьрел, Дербентда, Махачкъалада, Къусарда, Бакуда ва масанра тухвай цIудралди фестивалра, килигунра иштиракна, анра кIвенкIвечи чкаяр кьуна. Яшар хьанватIани, музыкант, манидар яз агьалийрин гуьгьуьлар шадарунин кIвалах ада къени давамзава. ИкI, алай йисуз Кьасумхуьрел ЧIехи Гъалибвилин 65 йисан юбилей къейддайла, АгъастIалдал СтIал Сулейманан шииратдин йикъар, Ахцегьа игитвилин «Шарвили» эпосдин сувар тухудайла агьалийри Гьажибала Гьажимисриеваз капар яна.
Халкь патал тамамарзавай манийри, чIагъандай, тардай, чуьнгуьрдай, кфилдай язавай макьамри-авазри хьиз, Гьажибала Гьажимисриеван гуьгьуьлар гьуьрметлу ва чIехи хзандин, ферли 6 веледди ва 10-далай виниз хтулрини птулри шадарзава.