Курхуьруьн 1-нумрадин М.Рагьимован тIварунихъ галай юкьван школа районда чIехи ва чешнелу школайрикай сад я. Анин педколлективда чпихъ хъсан чирвилер, алакьунар авай ва лайихлу тIварарин сагьибар гзаф ава.
Ихьтинбурукай сад и школада лезги чIаланни литературадин тарсар гузвай муаллим «Дагъустан Республикадин лайихлу муаллим» Межидова Гуьзел Алиевна я. Адан лайихлувилерикай чаз и школадин директор Шихбабаев Шихбуба муаллимди гегьенш суьгьбет авуна. Директордин ихтилатрай чаз чир хьайивал, Гуьзел Алиевнади и шко¬лада 1975-йисалай кIвалахзава. Дербентдин педучилище куьтягьай ада и школада сифтедай пионервожатыйвиле кIвалахна. Гуьгъуьнлай ам ДГУ-диз гьахьна ва 1982-йисуз заочнидаказ и вуздин филологиядин факультет акьалтIарна. Пионервожатыйвиле кIвалахдай йисара, адан зегьметдиз Вирисоюздин пионеррин организациядин советди «Пионеррихъ галаз активдаказ кIвалах авунай» знак ганай. Ам республикадин комсомолрин тешкилатдин 40 лагьай конференциядиз райондин патай делегат яз хкянай.
И йисара Гуьзел Алиевнади хайи школада, хуьре, адалай къеце менфятлу хейлин кIвалахар авунва. Ингье 1991-йисалай ада вичин рикI алай пешедай, яни муаллим яз кIвалахзава. Эхиримжи вахтара и школадиз хейлин жегьил муаллимар кIвалахал хквезва. Девлетлу тежриба хьанвай Гуьзел Алиевнадикай абуру даях, куьмекчи кьазва. Ада тарс гайи аялрикай хъсан пешекарар, алимар хьанва.
КIвалахдал рикI хьун, аялрихъ га¬лаз авай гьар йикъан хуш рафтарвал, диде-бубайрихъ галаз авай алакъаяр себеб яз, Г. Межидовади коллективда виридан патай еке гьуьрмет ва авторитет къазанмишнава. Школа¬дин руководстводи хъсан муаллим яз адан тIвар педсоветдин заседанийрал ва маса мярекатрални кьазва. Ада аялриз гузвай гьар са тарс маналуди жезвайди аялри районда ва адалай къецени жезвай школьникрин олимпиадайра къазанмишай нетижайрайни аквазва. Г. Межидовадин тежрибадикай гзаф муаллимри менфят къачузва, санлай школада тербия ва чир¬вилер гунин кIвалахни вилик физва, - лугьузва школадин директорди. Мад са кIвалах къейд ийиз кIанзава, 1996-кIелунин йисуз Гуьзел Алиевна «Россиядин Федерациядин просвещенидин отличник» лагьай тIварцIизни лайихлу хьана. Ада акьалтзавай жегьил несилдиз дерин чирвилер, дуьз тербия гунин, абур зегьметдал ашукьардай цIийи-цIийи къайдаяр жагъуриз, кIвалахда ишлемишзава.
Тежрибалу муаллимди руковод¬ство гайи класс «Школада виридалай вилик квай класс» тIварцIиз лай¬ихлу хьана. Ада школада мукьвал-мукьвал ачух тарсар тухузва. Обще¬ственный уьмуьрдани Гуьзел муал¬лимди активвилелди иштиракзава. Ирид йисуз ада школадин методобъединенидиз регьбервал гана, ругуд йисуз профсоюздин комитетдин кьиле акъвазна.
Гзаф йисара муаллимвиле намуслувилелди кIвалах авунай акьалтзавай не¬силдиз дерин чирвилер ва тербия гунай Гуьзел Алиевнадиз «Дагъустан Республикадин лайихлу муаллим» лагьай гьуьрметдин чIехи тIвар ганва. ИкI вичин зегьметдиз еке къимет гуни ам кIвалахда мадни ашкъиламишдайдал са шакни алач.
