Малум тирвал, 2010-йисан 6-июлдиз кьабулай 50-нумрадин «Дагъустан Республикада муниципальный сечкияр тухунин гьакъиндай» Дагъустан Республикадин Закондин 12-статьядихъ галаз кьадайвал, алай йисан 10-октябрдиз республикада сечкияр кьиле фида. Сечкийрин метлебдикай, чи районда сечкийриз аквазвай гьазурвилерикай суьгьбет авун патал чун и йикъара «Сулейман-Стальский район» муниципальный райондин администрациядин Кьилин заместитель С. М. Велиевахъ галаз гуьруьшмиш хьана ва адавай са шумуд суалдиз жаваб гун тIалабна.
- Савин Мирзоевич, чи районда гьи муниципальный тешкилатра сечкияр кьиле фида? Адаз гьихьтин гьазурвилер аквазва?
- Дагъустан Республикадин 50-нумрадин Закондин 12-статьядихъ ва хуьрерин поселенийрин Уставрин 26-статьядихъ галаз кьадайвал, 10-октябрдиз чи районда 15 хуьруьн муниципальный тешкилатдин кьилер ва 16 тешкилатда хуьрерин Собранийрин депутатар хкяда. Лагьана кIанда хьи, и юкъуз Кьулан СтIалрин муниципальный тешкилатдин Кьил хкядай сечкияр жедач, адан векилвилерин вахт 2012-йисуз куьтягь жеда.
Хуьрерин муниципальный тешкилатрин Уставрин бинедаллаз Кьасумхуьруьн Собранидиз 15, Хпюкьрин Собранидиз 7, амай хуьрерин Собранийриз гьардаз 10 кас депутатар хкяда. Санлай вири хуьрерин Собранийриз 162 кас депутатар яз хкяда.
Къейд авун лазим я хьи, районда сечкияр тухуниз законрихъ галаз кьадайвал гьазурвилерни аквазва. Кьилди къачуртIа, хуьрера сечкийрин округар тешкилнава, комиссийрин председателрихъ, секретаррихъ, членрихъ галаз кIвалах тухванва.
Муниципальный тешкилатрин кьилер, хуьрерин Собранийрин депутатар хкягъунин гьакъиндай Решенияр сечкияр тухудай вахт жедалди 80 югъ амаз кьабулзава. Абур «Куьредин хабарар» газетдин 31-нумрада чапнава.
- Муниципальный тешкилатрин кьилер ва хуьрерин Собранийрин депутатар жез кIанзавай инсанривай заявленияр гьи вахтуналди кьабулзава?
- Чеб муниципальный тешкилатрин кьилер ва депутатар жез кIанзавайбурувай чпин кандидатураяр 23-августдалди къалуриз жеда. Кандидатураярни партийный организацийривай, зегьметчи коллективривай ва кьилди инсандивай вичивайни эцигиз жеда.
Муниципальный тешкилатрин комиссийри сечкичийрин списокар сечкияр тухудалди 21 югъ амаз гьазурна акьалтIарун лазим я.
Умудлу я, районда муниципальный тешкилатрин кьилер ва хуьрерин Собранийрин депутатар хкядай сечкияр законрихъ галаз кьадайвал кьиле фида.
