Мукьвара дидевилин капиталдиз талукь законда дегишвилер гьатда. Вичел асаслу яз аялар авай хзанриз гьукуматдин патай алава куьмекар гудай 256-нумрадин Федеральный закондик кухтун теклифзавай дегишвилер Госдумади ва Федерациядин Советди дуьзбур яз гьисабна. ЦIийивилер кухтунвай закон адан уьлкведин Президентди къул чIугурла къуватда гьатда.
Закондик кухтун теклифнавай сад лагьай дегишвал яшайишдин кIвалер эцигун ва я цIийикIа туькIуьр хъувун патал капиталдин пул ишлемишунин мумкинвилер гегьеншаруниз талукьди я. Закондик цIийивилер кухтадалди а пул яшайишдин кIвал анжах пудратдин организация арада аваз эцигиз жезвай. Гила закондик цIийивилер кухтурла, агьалийривай кIвал чпин къуватралди эцигиз жеда. КIвал цIийикIа туькIуьр хъувуниз талукь пункт закондик сифте яз кутазвайди я. КIвал цIийикIа туькIуьр хъувун - им авай кIвалин майдан гегьеншарун, яни са кIвал акал хъувун лагьай чIал я. КIвал пудратдин организация арада авачиз цIийикIа туькIуьр хъийиз жеда. КIвал цIийикIа туькIуьр хъувунни ам ремонт авун - ибур сад-садак какадарна виже къведач. КIвалин ремонтдиз дидевилин капитал харж ийидай ихтияр авач.
Яшайишдин кIвал эцигун ва цIийикIа туькIуьр хъувун патал дидевилин капитал пенсионный фондуниз кIвал эцигдай ва чилин патахъай ихтияр гузвай документ гьайила, ишлемишиз жеда. Кьилинди яшайишдин кIвал эцигдай ихтияр гузвай документ я. Герек тир вири документар гьайила, дидевилин капиталдикай 50 процент къачуз жеда. Зур йисалай хзанди кIвал гьакъикъатдани эцигзавайди тестикьарзавай документ гьайила (и документ яшайишдин кIвал эцигиз ихтияр гайи идарадай къачуз жеда), дидевилин капиталдин амай пайни вахчуз жеда. Закондик кухтунвай кьвед лагьай туькIуьр хъувун, эгер хзанди кIвал вичин хсуси пулунихъ эцигнаватIа, дидевилин капитал, пулдин компенсация хьиз, вахчуниз талукьди я. (Эгер кIвал 2007-йисан 1-январдилай фад вичин хсусиятдиз элкъуьрнавачтIа).
Дидевилин капиталдин сертификат къачун патал арзаяр вугудай вахтарани дегишвилер жеда. Алай макъамда, законда лугьузвайвал, дидевилин капиталдин сертификат къачун патал, аялдин 2 йисни 6 варз хьайила, арза вугузва. ТуькIуьр хъувунвай закондалди хзандивай арза аялдин пуд йис хьайила вугуз жеда.
ЦIийивилер кухтунвай законда инлай вилик законодательствода авачир хьтин дуьшуьшарни къалурда.
Алай вахтунда гражданвилин гьалдиз талукь актарин гьакъиндай закондал асаслу яз, аял хайи гьа сифте гьафтеда кьейитIа, адаз хайивилин шагьадатнама гузвач. Гила, закондик дегишвилер кухтурла, ахьтин аялриз хайивилин шагьадатнамаяр гуда. Хзанда ихьтин бахтсузвилер хьанвайбурувай (1997-йисан ноябрдилай), ЗАГС-диз фена, аялдиз хайивилин шагьадатнама ва адал асаслу яз дидевилин капиталдин сертификатни къачуз жеда.
РФ-дин Пенсионный фондунин РД-да авай отделенидин управляющийдин заместитель Руфийна Мегьамедовади къейдзавайвал, республикадин 90 процент агьалийриз дидевилин капитал кIвал къачуниз ва эцигуниз харж ийиз кIанзава. Адан фикирдалди, законда жезвай дегишвилери гьа капиталдин такьатар и жигьетдай ишлемишдай еке мумкинвал гуда. И пулунихъ, гьелбетда, кIвал эцигиз жедач, амма яшайишдин кIвалерин шартIар хъсанариз жеда.
Алай вахтунда дидевилин капиталдин кьадар 343,378 манат я. РД-да (2010-йисан 1-июлдалди) 71 агъзур касдиз дидевилин капиталдин сертификатар ганва.
