Къафкъаздин къадим ва бинелу халкьарикай сад тир лезгийрихъ гьар девирра хайи Ватан вири дуьньядиз машгьур авур баркаллу рушар ва рухваяр хьайиди я ва алай вахтундани абурун гелеваз физвайбур чахъ тIимил авач. Ихьтинбурун жергедай яз заз къе чIехибурун уьмуьрдиз рикIе еке къастар ва экуь мурадар аваз умудлу камар къачузвай, вичин бине чи райондин КIахцугърин хуьряй тир ва алай вахтунда ЦIийи поселокда яшамиш жезвай вичихъ еке гележег авай Агьмедханов Мурадхан Альдерхановичан тIварни еке гьуьрметдивди кьаз кIанзава.
2005-йисуз ЦIийи поселокдин юкьван школа агалкьунралди акьалтIарай жегьил гадади вичин уьмуьр хайи Ватандиз вафалудаказ къуллугъ авунин – низам-къайда хуьнин кардиз бахш авун кьетIна. Гьеле школада кIелзамаз кIелунин ва спортдин рекьяй къазанмишай агалкьунрай са шумудра Гьуьрметдин грамотаяр гуниз, чухсагъулар малумаруниз лайихлу хьайи Мурадхан гьа и йисуз Россиядин МВД-дин къенепатан кьушунрин Санкт-Петербургдин военный институтдик кIелиз экечIна ва алай йисуз анаг, лейтенантвилин чин къачуналди, Яру дипломдални къизилдин медалдалди куьтягьна, «Юриспруденция» пешекарвилин рекьяй юриствилин квалификация къачуна.
Мадни а кар къейд ийиз кIанзава хьи, и йикъара хайи хуьруьз хтайла ада вичихъ галаз авур суьгьбетда лагьайвал, алай йисуз и военный институт акьалтIарай 182 кас выпускникрикай-офицеррикай анжах 3 касди анаг Яру дипломрални къизилдин медалралди кIелна куьтягьна. Лейтенантвилин погонар абуруз Петропавловский къеледа ва дипломарни институтда вахкана.
Мурадхан Альдерхановича ана кIелдай йисарани вич савадлу курсант, хъсан спортсмен яз къалурна: старший сержантвилин чин авай ам анин курсантрин взводдин командирдин заместитель тир. 2008-йисан 27-декабрдиз адаз «Къуллугъда тафаватлу хьунай» хурал гьалдай значок, 2009-йисан 12-декабрдиз Санкт-Петербургдин военный институтдин кIвенкIвечивал патал рукопашный бойдай кьиле фейи акъажунра 75 килограммдал кьван агакьна заланвал авайбурун арада 2-чка кьунай Грамота гана.
2009-йисан 17-февралдиз М. Агьмедханов вичин хивевай аскервилин буржи намуслувилелди кьиле тухунай, акьуллу инициативадай, чалишмишвилерай, къуллугъда ва кIелунра тафаватлу хьунай Россиядин МВД-дин къенепатан кьушунрин Санкт-Петербургдин военный институтдин пайдахдин вилик шикил ягъуниз лайихлу хьана.
2009-йисан июндин вацра Агьмедханов Мурадхан Альдерханович Санкт-Петербургда международный экономический форум кьиле фидай вахтунда къуллугъдинни женгинин месэлаяр чешнелудаказ кьиле тухунай Россиядин МВД-дин къенепатан кьушунрин главнокомандующийдин заместитель, армиядин генерал Н. Е. Рогожкинан къул алаз Россиядин МВД-дин къенепатан кьушунрин главнокомандующийдин Грамота гуниз лайихлу хьана.
Жегьил офицер къазанмишнавай агалкьунрал сергьятламиш хьана акъвазнавач. Адахъ Санкт-Петербургда кIелун давамарунин ва къуллугъдин жигьетдайни вини дережадиз экъечIунин къаст ава.
Къуй вун ви рикIевай вири мурадрихъ агакьрай, Мурадхан!
Къейд ийиз кIанзава хьи, Мурадханан буба Альдерхана 1975-йисалай 2003-йисалди Воркута шегьерда МЧС-дин горноспасатель яз кIвалахна. Адан тIвар и жигьетдай уьлкведа акъуднавай махсус ктабдани гьатнава. Алай вахтунда ам вичин уьмуьрдин юлдаш Фаридани галаз пенсиядиз экъечIнава.
Эвленмиш хьанвай абурун руш Лиана вичиз хьанвай гъвечIи аялни галаз мукьвал-мукьвал диде-бубадал кьил чIугваз къведа. Эхь, ихьтин адалатлу хзанар чи обществодин мягькем даяхар я.
И макъалада вичикай ихтилат физвай жегьил офицер Агьмедханов Мурадханахъ чаз уьмуьрда ва къуллугъда гележегда мадни еке агалкьунар хьана кIанзава.
