Дуьньяда виридалайни багьади инсандин сагъламвал я, гьам патал инсанди вичин вири уьмуьрда къайгъу чIугвазва. Виридаз чизва хьи, духтурар галачиз сагъламвал хуьн фикирдиз гъун четин жезва, абур я йиф-югъ талгьана, чи сагъламвилин къаравулда акъвазнавайбур, гьамиша чун буржлубур.
2010-йисан 16-июндиз акъатай Дагъустан Республикадин Президент Мегьамедов Мегьамедсалам Мегьамедалиевичан 156-нумрадин Указдалди республикадин здравоохраненидин хиле гзаф йисара гьакъисагъвилелди зегьмет чIугунай чи райондин центральный больницадин ва поликлиникадин духтур-хирург Гьасанбеков Мегьамедшафи Сулеймановичаз «Дагъустан Республикадин лайихлу духтур» лагьай гьуьрметдин тIвар ганва.
Сифтени-сифте мубаракрай, ихьтин тIварар гьар акатай низ хьайитIани гузвайди туш, абур кьетIен лайихлувилер къазанмишай лайихлу ксариз гузвай тIварар я.
Гьасанбеков Мегьамедшафи Сулейманович 1961-йисан 2-январдиз Хив райондин Дардар хуьре муаллимдин хзанда дидедиз хьана.
Хайи хуьруьн сифтегьан, Кашан хуьруьн муьжуьд йисан ва Дагъустандин Огни шегьерда юкьван школаяр хъсан къиметралди акьалтIарай жегьил гада кIелун давамарун ва пеше къачун патал I978-йисуз Дагъустандин государстводин медицинадин институтдин лечебный факультетдик экечIна ва 1984-йисуз дерин чирвилер къачуна ам акьалтIарна.
Вичин зегьметдин рехъ М. Гьасанбекова гьеле студент яз, 1982-йисалай Махачкъала шегьердин 2-нумрадин больницада медбратвилелай башламишна. 1984-йисан августдилай ада хирургиядин хиле вичин чирвилер, ТАССР-дин Бугульмадин ЦРБ-дин базадин интернатурада хкажна. 1985-йисалай 1991-йисалди М. Гьасанбекова ТАССР-дин Мензелинск шегьерда сифте хирург-ординатор яз, 1988-йисалай отделенидин зеведишвиле ва Мензелинск шегьердин медучилищедин муаллимвиле кIвалахна.
Чирвилерихъ къаних жегьил пешекарди и йисара Казандин, Москвадин, Махачкъаладин махсус институтра вичин чирвилер хкажна.
1991-йисан апрелдиз ам чи райондин ЦРБ-диз духтур-хирург яз кIвалахал хтана. Хирургиядин хиляй начагъбур диагностика ва сагъар хъувун патал ЦРБ-да алай девирдин истемишунрин жуьреяр кардик кутазва. Эндоскопиядин, уретроцистоскопиядин, ректоскопиядин, операционныйда лапароскопиядин къуллугъар кардик кутунин инициатор я. Адаз хирургиядин вири пешейрай дерин чирвилер ва гзаф йисарин тежриба ава.
Хирург Гьасанбекова илимдин рекьени кIвалахзава. Адан къелемдикай 7 илимдин кIвалах хкатнава. Абур илимдин журналра ва газетра чапнава. Мегьамедшафи духтурди чи райондин агьалийриз хьиз, къунши Хив, Кьурагь, Магьарамдхуьруьн, Агъул районрин агьалийризни куьмек гузва.
Икьван йисара ада чеб гьакьван важиблубур тир ортопедиядинни травмотологиядин, урологиядинни акушервилин хилера агъзурралди инсанриз, дуьшуьшдик акатиз, гъил-кIвач, маса кIарабар хайибурузни, бедендикай чеб сагъсузбур яз хкатайбурузни, жуьреба-жуьре азаррикди гьелек жезвайбурузни, абур арадал хкиз, сагъар хъийиз, мад уьмуьрдин генг рекьерал элячIдай мумкинвилер ганатIа низ чида!
Идалайни алава, адан патав хийирлу меслятар кIанз шумуд кас атана ни гьисабна!
Мегьамедшафи Сулеймановичаз районэгьлийрин ва вичи кIвалахз-авай ЦРБ-дин коллективдин арада еке гьуьрмет ава. За са шумуд касдивай ам гьихьтин пешекар я лагьана хабар кьуна. Виридан фикирар сад я: - Чаз Мегьамедшафи духтур фадлай чида. Ада чаз виридаз вич зурба чирвал авай, гьуьрмет-хатур хуьдай пешекар инсан тирди тестикьарна.
Ам вичин патав атанвай азарлу сагъар хъувун патал ял ядай югъ, сувар талгьана зегьмет чIугваз, герек хьайитIа, чи меркез Махачкъалада авай медакадемиядин профессорривай, республикадин диагностикадин центрдин пешекаррихъ галаз консультацияр тухвана, маса вичиз чидай, республикада тIвар-ван авай профессорривайни академикривай жузуна, са меслят авуна, азарлу сагъариз алахъдайдахъ фадлай инанмиш хьанва.
Намуслу, регьимлу инсан, бажарагълу духтур-хирург, уролог тир адан зегьметдиз гьукуматдин патай кутугай къиметни ганва. Ам кьилин категориядин духтур, «Дагъустан Республикадин лайихлу духтур» тIварц1ин, «Дагъустан Республикадин здравоохраненидин отличник» знакдин, ТАССР-дин здравоохраненидин министерстводин, чи райондин администрациядин Гьуьрметдин ва гзаф кьадар маса грамотайрин сагьиб я.
- Къенин юкъуз духтур гьихьтинди хьана кIанда? - лагьана гайи суалдиз жаваб яз ада ихьтин жаваб гана: - Чаз аквазвайвал, медицина югъ-къандавай вилик физва. ЦIийи жуьредин дарманар, аппаратар, томограф, УЗИ, ЭКГ, начагъбур сагъар хъийидай жуьрейрани дегишвилер жезва.
Иниз килигна гьар са духтур вичин пеше лап дериндай чидай, вичин пеше кIани, мадни чирвилер хкажиз алахъдайди, азарлудан гъавурда гьатдайди, дарманрални рапарал хьиз, ширин мецелди сагъардайди хьана кIанда.
Къуй вахъ сагъ чан, яргъалди тир бахтлу уьмуьр, хзанда, кIвалахда еке агалкьунар хьурай, гьуьрметлу духтур!
