Лезги халкьдин машгьур писатель, драматург, журналист ва публицист РФ-дин писателрин ва журналистрин Союзрин член, ДР-дин культурадин лайихлу работник ва къанажагълу инсан Магьмудов Абдулбари Агьмедович тийижир, адан яратмишунрихъ галаз таниш тушир кас лезги чилел бажагьат ала.
Вич халкьдин гегьенш къатарай акъатнавай, уьмуьрдин уькIуь-цуру акунвай адан эсеррин тематика гегьенш ва халкьдиз мукьва я. Прозадин ва драматургиядин эсеррин са шумуд ктабдин автор тир адан яратмишунриз халкьдин патай еке игьтияж ава. Адан къелемдикай хкатай драматургиядин эсерар – «Къалабулух квай гатфар» ва «Фур атIайди» тамашаяр лезги халкьди лезгийрин Госмуздрамтеатрдин сегьнедилай еке хушвилелди кьабулна.
Са вахтара чи райондин газетдин редакциядани жавабдар къуллугърал хьайи, хайи халкьдин халис белед тир писатель ва драматург Абдулбари Магьмудов дидеди хайидалай инихъ алай йисуз 80 йис тамам жезва.
И юбилейдин вилик чна чи газет кIелзавайбурун фикирдиз вичин гьар са эсер гьа девирдин ачух шагьид тир А. Магьмудован «Приватизация» юмореска (къаравили) гъизва.