Ингье, зулун кьил алай магьсулрин бегьерар кIватI хъийидай жавабдар вахтни алукьнава. Районда гад агудунин еришар къвердавай йигин жезва.
Алай йисан июнь-июль варцара райондин госпожнадзордин отделениди чи райондин сергьятда авай хуьруьн майишатдин карханайра (МУСП, ГУП, КФХ) цIаяр кьуникай хуьн тешкилнавай гьал ахтармишзава. Гзаф майишатрин руководителар и кардив жавабдарвал гьисс авуналди эгечIзава.
А кар рикIел хкиз кIанзава хьи, техилар ва алаф кIватIзавай вахт цIаяр кьунин хаталувал артух хьунихъ галаз алакъалу вахт я. Са гъвечIи цIелхемдилай, цIай кумаз гадрай пIапIрусдилай ва я спичкадин кьалунилайни цIай кьунин дуьшуьшар арадал атун, чIугур зегьметар бад-гьава фин мумкин я. Ахьтин чIуру нетижайрал татун патал техилар дигмиш хьайидалай гуьгъуьниз гад агудна куьтягьдалди майишатрин руководителри никIер суткадин вири вахтунда хуьн тешкилун герек я. Техилар авай никIерал гуьзчивал тухудайбур хьун герек я.
Гад агудунал машгъул тир инсанарихъ галаз цIаяр кьуникай хуьнин махсус инструктаж тухвана кIанда.
Са йикъан къене ядай никIин чка кьилди 8 метрдилай тIимил тушиз зул яна чара авун герек я. КIватIай техил тади гьалда хармандал агакьарна ва техил кIватIай чкадин юкьвай 4 метрдин гьяркьуьвал аваз цанин зул чIугуна кIанда. Вахтуналди ял ядай ва техника акъвазардай чка техил авай никIивай, самун таяйривай I00 метрдилай тIимил тушиз яргъа тешкилун меслят къалурзава. Техил ва самун алаф авай никIера пIапIрус чIугун, ачух цIай хъувун кIевелай къадагъа ийин.
Гад кIватIунин кIвалахрал чпин вири системаяр дуьз къайдадик кутунвай, цIун цIелхемар хкадардай къайдадик квай тадаракар алай техника ахъайна кIанда.
Гад агудунал машгъул трактордал са огнетушитель, са лопатка, яд ва къум авай емкостар хьун герек я. Комбайндал кьве огнетушитель, кьве лопатка ва автомашиндални са огнетушитель са лопатка хьана кIанда.
Техил авай никIи цIай кьур дуьшуьш хьайитIа, тади гьалда цIун виликай цанин зул тухвана кIанда. Техил михьзавай харманар алай чкаяр виликамаз зирзибилдикай ва кьурай векьерикай михьун герек я. Анрални цIай хкадардай шейэр хьун, электропроводкаяр къайдадик квайбур хьун лазим я.
ЦIаяр кьуникай хуьнин къайдайрал ва истемишунрал амал тийизвай руководителар, кардик квай законрихъ галаз кьадайвал, административный рекьяй жавабдарвилиз чIугвада.
Гьуьрметлу юлдашар, рикIел хьухь: фу чи девлет я, ам цIай кьуникай хуьх!