Алатай жуьмя юкъуз райадминистрацияда сад тир информациядин йикъан сергьятда аваз ДР-дин Халкьдин Собранидин депутатар тир Мегьамедов Гьамидуллагь Исмаилович ва Исакьов Сейфуллагь Бейдуллагьович райондин активдихъ галаз гуьруьшмиш хьана. Ам ДР-дин Халкьдин Собранидиз Дагъустан Республикадин Президентди рекье тур Чар гьялуниз талукьарнавайди тир.
И гуьруьшмишвал, атанвай багьа мугьманар тебрик авуналди, «Сулейман-Стальский район» МО-дин администрациядин кьилин везифаяр тамамарзавайди тир Агьмедов Мусаиб Гьажибалаевича ачухна ва кьиле тухвана.
Сифте анал гаф гана рахай С.Б.Исакьова ДР-дин Халкьдин Собранидин 36-сессиядал Дагъустан Республикадин Президент Мегьамедов Мегьамедсалам Мегьамедалиевича вичин рахунра алай вахтунда Дагъустанда арадал атанвай общественно-политический гьалариз дуьз къимет ганвайди, санлай республикадин экономика, агьалийрин яшайишдин дережа хкажун, хуьруьн майишат, промышленность ва абурун важиблу маса хилер вилик тухун, бейкарвал арадай акъудун, республикадиз инвестицияр желб авун, образование, здравоохранение, культура, туризм ва спорт мадни вилик тухун патал сифте нубатда инсанрин къанажагълувал, жавабдарвал хкажун герек тирди, экстремизмдихъ, коррупциядихъ галаз кIеви женг тухун чарасуз тирди, санлай кьурла, Дагъустан цIийикIа туькIуьр хъувунин чарасузвал арадал атанвайди ачухдаказ лагьайди къейд авуна.
Вичин рахунрин эхирдай ада залда ацукьнавайбурун патай гьар месэлайрай атай са жерге суалриз жавабар вахкана.
Гуьгъуьнлай анал Дагъустан Республикадин Халкьдин Собранидиз Дагъустан Республикадин Президентди ракъурнавай Чарче чпи кIвалахзавай хилерин гьакъиндай къарагъарнавай месэлайрин жигьетдай чпин фикирар, чпи тамамарзавай кIвалахрикай куьруь информацияр гваз райондин УСХ-дин начальник М.Бабаев, РУО-дин начальник Ж.Асланов, райондин архитектор Г.Гьуьсейнов рахана.
Анал экъечIна рахай ДР-дин Халкьдин Собранидин депутат Гь.И.Мегьамедова залда ацукьнавайбурун фикир а Чарче бязи чиновникрин саймазвилин, ришветбазвилин, жавабдарсузвилин, обществода гьалар къизгъинарунал гъизвай дуьшуьшрин гьакъиндай лагьанвай гафарал желбна ва абур чи къенин гьакъикъатдихъ галаз алакъаламишна. Ам образование авай гьалдал гегьеншдиз акъвазна.
Эхирдай ада райондин активдиз ДР-дин Гьукуматди Эминхуьре цIийи школа эцигун пландик кутунвайдан ва гьакIни «Сардаркент-Даркушказмаляр» водовод кардик кутун патал пулунин еке такьатар чара авунвайдан гьакъиндай шад хабар гана.
Эхирдай анал М.Гь.Агьмедова Президентдин Чарчин гьакъиндай вичин бязи фикирарни лагьана, ана вилик эцигнавай гзаф месэлаяр чи гележегдин программадиз элкъведайди къейдна.
И гуьруьшмишвал метлеблуди хьана.