Гьар йисуз Россиядин образованидин къурулушда 5,5 миллиард доллардин кьадарда аваз ришветар гузва ва къачузва. Анжах вузрик экечIун патал гузвай ришветри 1,5 миллиард доллар тешкилзава, хабар гузва ИТАР-ТАСС-ди РФ-дин МВД-дин экономикадин хатасузвилин Департаментдин (ДЭБ) делилрал асаслу яз.
ДЭБ-дин тади гьалда геле къекъведай (оперативно-розыскной) 3-отделдин начальник Александр Бланкован гафаралди, эхиримжи са йисан вахтунда образованидин хиле гузвай ришветрин кьадар кьве сеферда артух хьанва. Гьа са вахтунда, абурун юкьван кьадар 20 агъзур манатдиз барабар я.
Бланкован гафаралди, статистикадин делилри Россиядин образованида ришветрихъ галаз алакъалу яз авай гьалар тамамдаказ ачухзавач. ИкI, ришветрихъ галаз алакъалу делойри и хиле авай тахсиркарвилерин анжах 8 процент тешкилзава, гьа са вахтунда, 60 процент чуьнуьхунрихъ, тарашунрихъ, 12 процент дуьшуьшар къуллугъдин чкаяр хсуси хийирдиз ишлемишунихъ ва 10 процент - документар къалпламишунихъ галаз алакъалу я.
ДЭБ-дин векилди къейд авурвал, ришветбазар патал къвердавай гзаф бегенмиш чкаяр вузрин документар кьабулдай отделенияр ваъ, школаяр жезва. Бланкова им ЕГЭ кардик кутунихъ галаз алакъалу ийизва. Адан гафаралди, муаллимри аялриз экзаменрал куьмекар гузва, чиновникри виликамаз тапшуругъар малумарзава, ЕГЭ-дин сертификатар къалпламишзава.
Муьштерийрин ихтиярар хуьнин обществодин векил Виктор Панинан гафаралди, Россиядин вузра ришветдин вини кьил миллион манатдиз барабар я. Ада къейд авурвал, неинки вуздик экечIун, гьакIни зачеткада хъсан къиметар эцигун патал къачузвай ришветрин кьадарни хкаж хьанва. Панина гъайи мисалдалди, вузрин са профессорди хъсан къимет эцигун патал 260 агъзур манат истемишна.