Чаз малум тирвал, виликдай школайра гьуьрметлу пионерар гзаф авай. Абурун чIехи пай Ватандин ЧIехи дяведин иштиракчияр, зегьметдин ветеранар, инсанпересар тир. Чпикай рахазвай ихьтин пионерар Цмуррин хуьруьн юкьван школадихъ гзаф хьана. Абурукай сад, 1941-1945-йисарин Ватандин дяведин цIаярай, погонрал лейтенантвилин чин аваз хтай Мегьтиев Мирзебег халу тир. Чна (ам 1992-йисуз регьметдиз фена) ам рикIелай ракъурзавач. Адакай мукьвал-мукьвал суьгьбетар тешкилзава, адан уьмуьрдикай, метлеблу вакъиайрикай ихтилатар авун патал регьметлудан веледриз, мукьвабуруз школадиз теклифзава.
Цмуррин хуьре Мегьтиев Мирзебег кьакьан тушир, юкьван буйдин, гуьзел къаматдин, чIулав спелрикай хуш хъвердай, меслятчивилин шикилда авай агъсакъал яз карагзава аялрин суьгьбетрай. Ам чIехидазни гъвечIидаз, итимдизни дишегьлидиз дуст, буба яз, багьа инсанрикай хуьре хьайиди ашкара жезва кIелзавай аялриз.
Мирзебег буба Ватандин ЧIехи дяведин ва зегьметдин ветеран тир. Ада Советрин армиядин жергейра кIуьд йисуз къуллугънай. 1937-йисуз вичин буржи кьилиз акъудиз башламишай кьегьал цмурви анжах 1946-йисан зулуз ислягь зегьмет чIугваз хайи хуьруьз хтанай. Адан хурудал 12 медалдини орденди нур гузвай. Абур Цмурдал мягькемарай лигим бедендинни ялавлу руьгьдин викIегьвилери дяведин цIаяра къазанмишнавайбур тир.
1939-йисуз Финляндиядин дяве башламиш хьайи чIавуз Мегьтидин хва Мирзебега Къазан шегьерда авай танкарин училищеда кIелзавай. Курсантди, танкунихъ ацукьна, финрихъ галаз гьахълу женг тухванай.
«Мехъерикай» «мехъерик» фейид хьиз, жегьил танкист Ватандин ЧIехи дяведа 1941-йисан сад лагьай йикъарилай хьанай. Ленинграддин блокадада дагъларин уьлкведин хуьре авай хзандихъ (адаз диде, буба, жегьил свас, гъвечIи руш авай) вил галаз хьанай.
Ленинград къияматдин гьалкъадай акъудайдалай гуьгъуьниз М. Мегьтиева Курский дуга, Румыния, Польша азад авунин женгера иштиракна. Гъалибвилин Югъ ада Кенингсбергда къаршиламишнай.
Цмурдал детдомда, колхозда, хуьруьн Советдин председателвилин къуллугъарна, Бакуда нафтIадин буругърин устIар яз кIвалахнай.
Са хва Мирзебег тушир душмандикай Ватан хуьн патал дяведиз буба Мегьтиди, диде Алимата рекье турди. Картар хьтин кьве хва Мегьамедни Тагьирбег чи гуьзел, мублагь уьлкве патал къурбанднай абуру. Мегьамедни Тагьирбег кьведни 1943-йисуз дяведа телеф хьайивилин извещенияр къачунай Мегьтидини Алимата.