18-май. И юкъуз чIехи шаир СтIал Сулейман дидедиз хьана 141-йис тамам хьун адан ватанда Агъа СтIалдал шад гьалара къейдна.
Пакаман кьиляй Кьасумхуьр зуьрней-рин хуш сесери къачунвай. Сятдин 9-даз райондин центрдал алай Сулейманан гуьмбетдин патав аялар-пионерар гьуьрметдин къаравулда цуькверни гваз акъвазнавай.
Райадминистрациядин Кьилин сад лагьай заместитель М. Гь. Агьмедов кьиле аваз райадминистрациядин отделрин руководителар, идарайрин, карханайрин регьберар, яратмишдай интеллиген-циядин векилар гуьмбетдал атана, анал венокар ва цуьквер эцигна. Ахпа Герейханован хуьруьн кьилихъ галай гуьмбетдални цуьквер эцигна. ЧIехи межлис Агъа-СтIалдал давам хьана.
И шииратдин сувар куьруь гаф рахуналди райадминистрациядин кьилин заместитель С. Велиева ачухна. ЧIехи шаирдикай куьруь гаф рахайдалай гуьгъуьниз ада гаф шаир А. Камиловаз гана, межлис кьиле тухун адал тапшурмишна.
Гуьгъуьнлай анал рахай ЦIийи Макьарин юкьван школадин директор М. Салманова шаирдин уьмуьрдин ва яратмишунрин рекьикай гегьенш суьгьбет авуна. Шаир С. Саидгьасанова, писатель Н. Шихнабиева, Ибадулагь Гьажимир-зоевич Тагьирован тIварунихъ галай райондин Культурадин Дворецдин методистка Н. Юркъулиевади Сулей-манан бажарагъдикай, ада лезги халкь дуьньядиз машгьур авурдакай, адан гьар са гаф гегьвер тирдакай, чIехи шаирдин келимаяр дуьнья амай кьван рекьин тийидайдакай лагьана, адаз бахшнавай чпин шиирар кIелна.
«Куьредин ярар» медениятдин центрдин регьбер А. Агьмедпашаева шаирдин хва Мусаибакай суьгьбет авуна ва Р. Набиеван, А. Камилован, С. Агьмедпаша-евадин ктабар музейдиз пишкешна. Шаирдин хтул Л. Стальскаяди межлис къурмишайбуруз чухсагъул лагьана.
Эхирдай майдан райондин Культу-радин Дворецдин художественный самодеятельностдин коллективдин, райондин аялрин яратмишунрин КIвалин ва музыкальный школадин коллективрин ихтиярда туна, шадвилер яргъалди давам хьана.
СтIал Сулейман дидедиз хьана 141 йис тамам хьуниз талукьарна Агъа СтIалрин юкьван школадин спортзалда райондин хуьрерин хкягънавай командайрин арада волейболдай акъажунарни кьиле фена. Ана ирид командади иштиракна. Къизгъиндаказ кьиле фейи акъажунра сад лагьай чка Агъа СтIалрин, кьвед ва пуд лагьай чкаярни Герейханован, Вини СтIалрин хуьрерин командайри кьуна. Абуруз талукь тирвал пулдин пишкешар гана. И мярекатдиз пулдин такьатар райадминистрацияди ва и хуьруьнви карчи Максим Аскерова чара авуна.