Ватандин ЧIехи дяведа гъалибвал къачуник пай кутур гзаф кьегьалриз яргъалди яшамиш хьун кьисмет хьанач. Абурукай сад – Ивигрин хуьряй тир Шахбанов Буба Аллагьвердиевичакай за са кьадар делилар кIватIна. ЧIехи Гъалибвилин 65 йисан вилик адакай газет кIелзавайбуруз суьгьбет авун кутугнавай кар яз акуна заз.
Буба Аллагьвердиевич 1920-йисан 15-мартдиз дидедиз хьана. Ада 1942- йисан 18-февралдиз 211- стрелковый полкуна военный присяга кьабулна. Ада Советрин Армиядиз пешекарар гьазурун патал оборонно- массовый еке кIвалах тухвана. Идай Б. Шахбановаз Осоавиахимдин (ДОСААФ) райсоветдин грамота гана.
Гуьгъуьнилай ам гуьгьуьллувилелди фронтдиз фена. Рагьметлудан багърийри заз лагьайвал, Буба Аллагьвердиевича гуьгъуьнилай дяведин йисар гъалаба кваз рикIел хкидай.
«Женгина жуван юлдашар телеф хьун- им рикIивай кьабулиз тежедай, дертлу кар я»- лугьудалдай Б. Шахбанова.
ВикIегь, женгинин кар хъсандиз чидай ивигарвиди 1944-йисан июлдилай дяведин эхирдалди 136- пушкайринни артиллериядин составда аваз яракьдин командир яз женгера иштиракна. Рагьметлуда Прага шегьер азад хъувун патал кьиле фейи къати женгер, сентябрдин мекьи йикъара душманди гузвай гуьллейрин харцизни килиг тавуна Висла вацIай экъечIай вахтар мукьвал- мукьвал рикIел хкидалдай.
1944-йисан 14-сентябрдиз Прага шегьер азад хъувунай Б.Шахбановаз фронтдин командованиди чухсагъул малумарна.
Варшава шегьердилай кьибледихъ кьиле фейи къати женгера жуьрэтлувал къалурунай адаз 1945-йисан 16-январдиз Верховный Главнокомандующий В.И.Сталинан приказдалди чухсагъул малумарна ва «Варшава азад хъувунай» медаль гана. Кьегьал ивигарвиди душмандин магъара тир Берлин къачун патал кьиле фейи лап къати женгерани иштиракна. Берлин къачунай ва душмандин гзаф кьадар аскерарни офицерар, женгинин техника гьалкъада кьуна, ахпа абур терг авунай 1945-йисан 2-майдиз Сталинан приказдалди адаз мад чухсагъул малумарна.
Рейхстагдин цлал «Чун гьахъ тир, гьавиляй чун гъалибни хьана. Ивигарви Буба Шахбанов» гафар кхьей ам, винидихъ тIварар кьур женгинин наградайрилай гъейри, «Яру Гъед» орден, «Германиядин винел гъалиб хьунай», «Женгера лайихлувилерай» ва маса медалар хурудал алаз- гъалибчи яз хайи хуьруьз хтана.
1946-йисуз Б.Шахбанов КПСС-дин жергейриз гьахьна. Гьа и йисуз адакай Кьасумхуьруьн райсоветдин гособеспеченидин отделда старший инспектор хьана.
1947-йисуз ада Дербентдин педучилище акьалтIарна, гуьгъуьнилай Цмурдал интернатдин директорвиле, Кьасумхуьруьн райкомда, Дербент шегьерда авай дагъвийрин Сталинан тIварунихъ галай школа- интернатда бухгалтервиле, столоваядин зеведишвиле кIвалахна.
Гуьгъуьнилай Буба Аллагьвердиевич Бакудиз фена, ана «Азнефть» объединенида нафтIадин тадаракрин операторвиле кIвалахна. Намуслу зегьметдай ам 1975-йисуз «Соцсоревнованида гъалиб хьайиди» ва 1981- йисуз «Коммунистический зегьметдин зарбачи» знакриз лайихлу хьана.
Фронтда кьегьалвилер, зегьметда зиреквал къалурай, вичин вири уьмуьр намуслудаказ тухвай Буба Аллагьвердиевич 1993-йисуз Бакуда рагьметдиз фена, гьана кучуднава.
Катран мукай кард къарагъда, лугьузва бубайрин мисалда. Буба Шахбанован рушар тир Феридади, Фаизади, Секината, Гуляди, Наидади, Индиради кьилин образованияр къачуна, чпин хзанар хьана, Бакуда, Махачкъалада ва Кьасумхуьрел жуьреба- жуьре пешейрин иесияр яз кIвалахзава.
Эхь, веледрикайни рагьметлудан руьгь секин я.
