Гьеле Кьасумхуьруьн 2-нумрадин юкьван школада кIелдай йисара Къурбанов Аслан самбодал ва дзюдодал рикIивай машгъул хьанай.Са шумудра республиканский ва Вирироссиядин турнирра, Россиядин чемпионатра, гьакIни Бакуда кьиле фейи международный турнирда 1, 2 ва 3-чкаяр кьунай. Машгьур спортсменар, тренерар тир вичин дах Юрадин, имияр Рамазан ва Тельман Къурбановрин гъилик вердишвилер къачур Аслан, юкьван школа акьалт1арна, 2009-йисуз Владимирдин юридический университетдик экечIна. Спортдал машгъул хьун давамарзавай А. Къурбанова и йикъара Москвада кьиле фейи Вирироссиядин чIехи турнирда иштиракна. 18 йис хьанвай жаванди чIехибурун арада тухузвай и турнирда вичихъ самбодай устадвал авайди къалурна. ИкI, 74 килограммдин заланвиляй Аслана 7 спортсмендин, гьа гьисабдай яз финалда дуьньядин чемпиондин винел гъалибвал къачуна, турнирда 1-чка кьуна. Идахъ галаз санал, А. Къурбанова и турнирда РФ-дин спортдин мастервилин дережа къачуна.