Ватандин ЧIехи дяведа фашистрин Германиядин винел гъалибвал къачуник цIудралди къайдаяр хуьдай органрин работникрини еке пай кутунай. Абурукай яз завай гьуьрметдивди рагьметлу Камилов Камил Вагьидовичан тIвар кьаз жеда. Дяве башламиш хьайила адан 16 йис тир. КьепIирдал 8-класс куьтягьайла ам хайиди тир Агъа Макьарал хтана. Камилан чIехи стхаяр армияда авай, вахтарни четинбур тир. Гьавиляй ада Кьурагьа ачухнавай 3 вацран колхозрин курсара кIелна, ахпа Салманан тIварунихъ галай колхозда счетоводвиле кIвалахна.
18 йис тамам хьайила, 1943-йисан 3-июндиз, К. Камиловаз Кьурагьрин райвоенкоматдай повестка хтана. Ада Грузиядин Батуми шегьерда къуллугъна. Рагьметлуда гьа йисарикай, вичин къуллугъдикай икI лугьудай: «Германиядини Туьркияди виликамаз ихьтин икьрар кутIуннавай. Немсери Сталинград къачурла, туьрквери Кавказдал гьужум ийида ва Бакудин нафтIадин мяденрал вичин пац эцигда. Амма абурун алчах мурадар кьилиз акъатнач. 1943-йисан хъуьтIуьз фашистар кьулухъ катуниз мажбур хьайила туьркверивай чи уьлкведал вегьиз хьанач. ЯтIани Туьркиядихъ галаз авай сергьятарни йифиз-юкъуз хвена кIанзавай... Чи везифа вуч тир лагьайтIа, душмандин самолетар шагьердал татун патал гьар йифиз тросдихъ агална аэростатар цавуз ахъаюн. Эгер самолетар атайтIа, абур аэростатрихъ галукьдай ва гьа цава хъиткьиндай».
Гьа икI, Туьркиядикай игьтият аваз, К. Камилова дяве куьтягь жедалди Батумида къуллугъна. Хурудал Ватандин ЧIехи дяведин 2-дережадин орден, «Кавказ оборона авунай», «Германиядин винел гъалиб хьунай», «1941-1945-йисарин фронтовик» медалар алаз ам 1948-йисуз армиядин жергейрай хуьруьз хтана.
Дяведилай гуьгъуьниз Камил Вагьидовича саки 30 йисуз Кьурагьа, Хивда, Белижда ва Дербентда паспортдин столдин начальниквиле намуслувилелди кIвалахна. Идай К. Камиловаз «Милициядин отличник» знак, 15-дав агакьна медалар, республикадин МВД-дин патай грамотаяр, тIвар кхьенвай сят, радиоприемник гана.
Ватандин ЧIехи дяведин, МВД-дин ветеран, чIехи ва гьуьрметлу хзандин кьил хьиз, Камил Вагьидивич хъсан шаирни тир. Ада «Кьуьзуьвал» шиирда кхьенай:
Эй агат хьанвай кьуьзуьвал,
Вун заз мугьман хьана хьи!
Йикъалай-къуз чIур жезва гьал,
Эхир вид ажал хьана хьи.
Вичин къанажагълу вири уьмуьр намус кваз, гьахъвал гваз тухвай, 2009-йисуз вилик рагьметдиз фейи Камил Вагьидовичан экуь къамат чи рикIера амукьда.
