Герейханован хуьре неинки чи райондин, гьакI маса районрин хуьрерай куьч хьанвай хейлин хзанар гьуьрметлудаказ ва хатурлудаказ яшамиш жезва. Абурукай сад Абдулкъадиров Исмаил Гьажибеговичан хзан я.
- Чи хзан тIебиатдин гуьзел чкадал, Гуьлгери вацIун къерехдал бинеламиш хьанвай и чIехи хуьре яшамиш жез 50 йисалай виниз я, - лугьузва И. Абдулкъадирова. – Хуьруьн жемятди чаз, чна жемятдиз гьуьрметзава. Им чна бахтлувал яз гьисабзава.
И. Абдулкъадирован ери-бине Ахцегь райондай я. Ам Ялахърин хуьре 1922-йисан 21-январдиз лежбер хзанда дидедиз хьана. 1937-йисуз хуьруьн школада 7-класс акьалтIарай ам кьадар-кьисметди Баку шегьердиз акъудна. Ина военно-пехотный училище акьалтIарна младший лейтенантвилин чин къачур И. Абдулкъадирова 1942-йисан июндилай Закавказский фронтдин 61-стрелковый дивизиядин 66-полкуна минометчикрин взводдин командир яз женгера иштиракна. Са женгина залан хер хьайи ам Гагра шегьерда авай 1818-нумрадин госпиталда сагъар хъувуна. 1943-йисан мартдилай 1-Украинадин фронтдин 28-дивизиядин 117-полкуна минометчикрин взводдин командир яз ам мад женгерик экечI хъувуна. КичIевал, кьулухъ акъвазун чир тахьай, гьар са женгина вилик жергейра хьайи И. Абдулкъадировал 1943-йисан августдиз мад залан хер хьана. Свердловский областдин Сузме шегьерда 3751-нумрадин госпиталда сагъар хъувурдалай гуьгъуьниз ада са йисуз Закавказский фронтдин резервда авай 31-полкуна къуллугъ хъувуна.
Женгера къалурай кьегьалвилерай И. Абдулкъадироваз Ватандин ЧIехи дяведин 1-дережадин орден, «Кавказ оборона авунай», «1941-1945-йисара Германиядин винел гъалиб хьунай», «За отвагу» ва маса медалар гана, пуд сеферда адаз СССР-дин Яракьлу Къуватрин Верховный Главнокомандующий В. И. Сталинан тIварунихъай чухсагъулар малумарна.
Дяведилай гуьгъуьниз И. Абдулкъадирова саки 40 йисуз производствода намуслудаказ зегьмет чIугуна.
Исмаил Гьажибегович ЧIехи Гъалибвилин 40,50,60 йисарин юбилейрин, «Зегьметдин ветеран» медалрин сагьибни я.
- Чаз дяведин цIай-гум, каш-мекь акуна, мад абур гьич садазни, садрани тахкурай, - лугьузва уьмуьрдин уькIуь-цуру гзаф акур Исмаил Гьажибеговича. – Къуй дуьньяда ислягьвили, абадвили, мублагьвили агъавал авурай!