Ингье, гатфарин кьвед лагьай варз тир апрелни алукьнава. Ам гьихьтинди жеда? И жигьетдай Дагъустандин гидрометцентрдин начальник Поставик Петрди икI лугьузва:
- Гатфарин сифтегьан варз тир март са кьадар къана атанатIани апрелди чаз гатфар алукьнавайдакай хабар гуда. Апрелдин сад лагьай пай, еке чимивал гвачиз, са къайдада аваз къведа. Къвалар гзаф йисарин рекъемрив гекъигайла нормадилай са тIимил артух жеда. Юкьван гьисабдалди кьурла, вацран температуради 10-12 градус чимивал тешкилда, дагълух районра, лагьайтIа, 8-10 градус чими жеда. Им алатай йисарив гекъигайла 1-2 градусдин гзаф я.
Агъуз тир температура вацран сифтегьан декадада (10 юкъуз) жеда. Йифен сятера температура 0-5 градусдин, юкъузни 7-12 градусдин чими жеда. Дагълух районра йифиз 1-6 градусдин мекьивал, юкъузни 3-8 градус чими жеда. Вацран бязи йикъара гьавадин температура 23-28-градусдихъ агакьна, дагълух районрани 20-25 градусдин чими жеда. И вацра къвалрин кьадар нормадилай са тIимил артух жеда, абурни асул гьисабдалди вацран сифтегьан паюна къвада.
ВацIара цин кьадар къвез-къвез артух жеда.
Санлай кьурла и варз хуьруьн майишатда гатфарин чуьлдин кIвалахар кьиле тухун патал къулайди жеда.