Ата-бубайрилай чаз багьа ирс яз атанвай Яран сувар къведалди мартдин вацра, гьар са чими рагъ авай йикъакай менфят къачуна, аялар яран кьалар кIватIиз чуьлдиз фидай, кьаларикай ни гзаф ва яцIу типIихар кьада лугьуз аялри гьуьжетар кьадай. Яран кьаларин типIихар кьакьан къавал акъуддай. Яран суварин юкъуз абуруз цIай ядай ва къавун 4 пипIел 4 вагьрамдал палдумар акIурна, ярар акъуддай. Чпи лагьайтIа, «гьурра!» лугьуз, цIалай хкадардай.
Яран суварин югъ атайла аялри садан гардандиз далдамдин еб, садан чантани вегьена, - «яран паяр це!» - лугьуз, гьар са кIвале къекъведай. Бадейри аялриз чпи кьурурнавай гуьрер (зурар), хутар, кIерецар ва яру ранг янавай суварин какаярни гудай. Аялриз акьван шад жедай хьи, абуру суварин паяр виридаз сад хьиз апайдай. Яран йифиз тIямлу хуьрекар гьазурдай ва 7 кIвализ апайдай.
Яран сувариз рикI алаз дангу гьазурдай: чIехи къажгъан эцигна, сифте гьажикIаяр ргадай, ахпа абурук къуьл ва пахлаяр акадардай. Вири са кIарасдикай авунвай еке кукIвадиз ва я ленгердиз ичIирна, кIерецдин хехвер акадардай. Пагь, вичин тIям, дад гьикьван ширин тир! ГьакI мехкIуьтар, натIуфаяр ва афарар, гуьрзеяр (хчадин хинкIарар) гьазурдай, яни яран юкъуз вергерикай гьазурнавай 8 гуьрзе тIуьна кIанда лугьудай.
Пакадин юкъуз, фад хьиз къарагъна, жегьил рушари, сусари ихьтин гафар лугьуз, гьаятар, къавар еке верхи кулуналди шткидай «КIвале авай шар-пепе гьуьлуьз фирай – гьуьле авай мал-хазина кIвализ атурай!».
Вахтар дегиш хьана, къавар шифер, ракь ягъиз кIевна. ЦIаяр чилерал авуниз мажбур хьана. Куьгьне хьанвай каларар, пекер кIватIна, солярка илична кудай. Яран сувар алукьдалди марфар къвайила яшлу инсанриз шад жедай, абуру лугьудай: «Чиле векь, никIе къуьл, тарарал емишар бул, яшайиш хъсанди жеда».
Эгер яраз ва яралай гуьгъуьниз къваз хьайитIа, абуру лугьудай: «Лияр кIатIал хкаж жеда», яни малариз векь я кIваляй, я чуьлдай жагъидач, малар гишила рекьида. Мадни яшлу инсанри ихьтин гафар лугьудай: «Я къавун чIередихъ руг галамукьдач, я кандуда гъуьр амукьдач».
Мартдин эхирдай цуьквер, векьер экъечIна гьава михьи хьана, цуькверин атир гьатайла, абуру лугьудай: «Эхь, чи кIвалериз берекат къведа».
Алай вахтунда суварин цIаяр гьар са куьчеда машинрин куьгьне чархар ва кIарасар кIватIна ийизва. Пикардаяр ва фейерверкар ахъайзавай, ван ийидай шейэр хъиткьинарзава. Къуй атанвай цIийи йис Сад тир Аллагь таалади вичи чаз берекат галайди яз гурай!