Райондин прокуратуради яшар тамам тахьанвайбурун ва жегьилрин патай къайдаяр чIурунин, абур гуьзчивиликай хкатунин дуьшуьшар тагькимарунин жигьетдай 2009-йисуз кьиле тухвай кIвалахдин нетижаяр веревирд авуна ва умумиламишна.
И жигьетдай и месэлайрихъ галаз алакъалу тир къуллугъри ва организацийри, гьа жигьетдай яз «Сулейман-Стальский район» муниципальный райондин ЗП-ди ва яшар тамам тахьанвайбурун крариз килигдай комиссияди, РОВД-дин ПДН-ди, райондин опекадинни попечительстводин органди, ЦРБ-ди, ЦЗН-ди, УСЗН-ди къейд ийиз жедай тайин кIвалах тухвана.
2009-йисуз райондин ва гьакIни республикадин дережада, илимда ва спортда виниз тир кукIушар муьтIуьгъарунин мураддалди, хъсан нетижаяр къазанмишуналди, райондин гзаф кьадар жегьилар ва бажарагълу кIелзавай аялар тафаватлу хьана. И карди ва вири хъсан крари чун шадарзава, чи халкьарин садвал ва дуствал мягькемарзава, тахсиркарвилер, гьа жигьетдай яз жегьилрин арадани, абур арадал атуниз ва тагькимаруниз куьмек гузва. Бубайрин мисалда лугьудайвал, инсанвилин дережа къалурунин лишан-зегьмет я.
Идахъ галаз сад хьиз, къейд ийиз кIанзава хьи, и месэладин жигьетдай рехъ ганвай са жерге кимивилер, бес кьадар фикир таганвай ва гьял хъувуна кIанзавай кIвалахарни ама, и кардихъ галаз алакъалу тир къуллугъри жегьилрихъ галаз талукь тир профилактикадин кIвалах истемишунрихъ галаз кьадайвал тешкилнавач, гьал зайиф участокра ам кар кьетI ийидайвал эцигнавач.
2009-йисуз яшар тамам тахьанвайбурун патай, чарадан яшайишдин кIвалериз ва маса дараматриз гьахьуналди, маса касдин эменни чуьнуьхунин са жерге тахсиркарвилер хьана. Вири санлай шаз ихьтин 9 тахсиркарвал авуна (6 кас жавабдарвилиз чIугуна, садан жигьетдай мажбури медицинадин къайдадин серенжем кьабулна). Гьелбетда, абурун ва гьакIни милициядин учетда авай, тербия четиндиз кьабулзавай яшар тамам тахьанвайбурун ва жаванрин гьакъиндай абурун диде-бубайрик теспечавал акат тавуна амукьдач.
Къейд ийиз кIанзава хьи, чна винидихъ гъанвайбур тайин къайдада РОВД-да регистрация авунвай тахсиркарвилер я. Амма къайдаяр хуьдай органриз талгьана чуьнуьхарнавай ихьтин тахсиркаривилер низ чида мад гьикьван хьанатIа. Эгер ахьтин тахсиркарвилер винел акъуд тийиз, чуьнуьхиз хьайитIа, абуру гьабурулайни фейи залан тахсиркарвилер авун мумкин я.
Гьуьрметлу диде-бубаяр, гьелбетда, къайдаяр хуьдай органрин работникрин макьсад абур кьаз, ацукьарун туш. Абурунди ахьтин тахсиркарвилер мад тахьун патал тагькимарунин профилактикадин кIвалах тухун я. Куьнени куь аялар суддин скамейкадал ацукь тавун патал и жигьетдай абурухъ галаз гъавурда тунин кIвалах тухун герек я. Куьне абур кIваливай къеце нихъ галаз жезватIа, квел машгъул ятIа чирна кIанда, абур исламдин экстремиствилин гьерекатрихъ галаз алакъада тахьун патал кар кьетIдай серенжемар кьабулун герек я. Къе аялдихъ галаз са декьикьада ийидай рахунри адан вири уьмуьр секин ва бахтлуди авун мумкин я.
Яшар тамам тахьанвай аялар пIапIрусар чIугунал, ички, бейгьуш квай шейэр ишлемишунал машгъул хьуни, абурун бедендиз ва гьакIни психикадиз чIуру патахъ еке таъсир ийидайди ва туьхкIуьр тежер нетижайрал гъидайди рикIелай ракъурна кIандач.
Гьалтзавай четин месэлайрин ва суалрин патахъай райондин прокуратурадин агъадихъ галай рабочий телефондиз зенг ийиз жеда: 3-12-32
