Эхиримжи йисара чи баркаллу рушари кIелунин рекьяй гьар жуьрейрин конкурсра чпин артуханвал къалурзава.
Рагьманова Гуьлнара Нажмудинан руш Кьасумхуьруьн 1-нумрадин юкьван школада лап хъсан къиметар аваз кIелай рушарикай сад я. Адан дидени буба кьведни школада кIвалахзавай гьуьрметлу муаллимар я.
Гуьлнаради гьеле школада амаз райондин ва республикадин олимпиадайра инглис чIалай, химиядай, физикадай са шумудра кIвенкIвечи чкаяр кьунай.
2005-йисуз отличница руша 11-класс акьалтIарна, вичин кIелунин рехъ давамарун патал Дагъустандин государстводин университетдиз гьахьна. Гуьлнаради анин экономикадин факультетдин маркетингдин отделенида «вадралди» кIелзава. Ада школада амаз ЕГЭ-яр хъсан къиметралди вахкана, гьа нетижайрай ам университетдизни кьабулна. Вичин кIелунрин рекьяй къазанмишзавай агалкьунралди ада неинки школадин ва гьакIни университетдин тIварни виниз хкажзава.
Курсунин старостани яз адаз виридан арада гьуьрметни ава. Гуьлнаради ДГУ-динни политехнический университетдин студентрин арада кьиле фейи конкурсра, олимпиадайра математикадай кIвенкIвечи чкаяр кьуна. 2009-йисан декабрдин вацра, Казанда Россиядин 44 вузрин арада кьиле фейи олимпиадада иштирак авур Гуьлнарадиз маркетингдай 2-дережадин диплом гана. Дагъустандин вузрай аниз 3 руш ракъурнавай.
Анай хтайла студенткаяр ДГУ-дин ректорди хушвилелди кьабулна, агалкьун мубарак авунихъ галаз санал Гуьлнарадиз пулдин премияни гана.
Ихьтин акьуллу аялрал неинки абурун диде-бубайри, гьакIни абуру кIелай школайрин коллективрини дамахзава.
Чнани Гуьлнарадиз алукьнавай ЦIийи йисни, дипломни мубаракзава, адахъ мадни чIехи агалкьунар хьун чи мурад я.