ЦIийи йис алукьдалди вилик, 31-декабрдин нянихъ, Кьасумхуьруьн майдандал хъсандиз безетмишна туькIуьрнавай елкадин патав 2010-йис алукьуниз талукьарнавай шадвилин мярекат кьиле фена. Тайинарнавай вахт хьайила, яни нянин сятдин 3 тамам жедайла, кIеретI-кIеретI хьана гзаф инсанар елкадин патав кIватI хьана. Райондин Культурадин Дворецдин музыкантри язавай лезги авазар кьуд патаз чкIизвай.
Суварин межлис, анал кIватI хьанвайбуруз ва вири районэгьлийриз 2010-йис мубарак авуналди, тебрикдин хуш келимаяр лугьуналди, райондин аялрин яратмишунрин КIвалин директор Мурвет Милагьимова ва Культурадин Дворецдин методист Назифа Юркъулиевади ачухна, абуру и межлисни кьиле тухвана.
Шадвилин межлисдал рахай райондин администрациядин кьилин везифаяр тамамарзавайди тир Мусаиб Гьажибалаевич Агьмедова эхиримжи вахтара Имам Музамудинович Яралиеван регьбервилик кваз районда социальный, экономикадин, яшайишдин ва культурадин жигьетдай авунвай еке кIвалахрикай ва и рекьерай цIийи йисуз планламишнавай кIвалахрикай гегьеншдиз суьгьбетна. Эхирдай ада Имам Музамудиновичан, администрациядин ва депутатрин Собранидин патай вири районэгьлийриз ЦIийи йис мубаракна, абурухъ чандин сагъвал, хзанра бахт, берекат ва гьар са карда агалкьунар хьана кIанзавайди лагьана.
КIватI хьанвайбурун вилик экъечIай Аяз Бубадини Живед ханума межлисдин иштиракчийриз сувар тебрик авурдалай гуьгъуьниз бицIекриз Аяз Бубадин савкьватар авай шешелдай акъудиз булвилелди пишкешар гана.
Гьевескарар тир Эминуллагь Кьадиева, Азим Ризаева, Селимат Гьажиевади, Эрик Бабаева, Зугьраб Мегьамедова, фольклордин «Куьре» ансамблди, Кьасумхуьруьн 1-нумрадин юкьван школадин рушарин хорди манияр лугьуналди, музыкантри лезги авазар ягъуналди суварин межлис мадни гурлу авуна.