Дагъви дишегьли – шаир. Къадимлу лезги халкьдин арадайни абур тIимил акъатнач. Агъа-стIалрин къазмайрилай тир Къехлеран руш Зумрият Шамсудинова абурукай сад я. Шиирар кхьиз ада гьеле школада кIелзавай йисара башламишна. Кьадар-кьисметди ам Сухокумскдиз, Къазахстандиз акъудна, ада жуьреба-жуьре пешейрин иеси яз кIвалахна.
Ватандиз, инсанриз, тIебиатдиз, муьгьуьббатдиз бахшнавай шииррал эхиримжи йисара Зумрият Шамсудиновади кхьиз башламишнавай диндин шиирарни алава хъхьана.
РикIе Аллагь авай, мецел шиирдин цIарар алай адан эсерар «Самур» журналдиз, «Лезги газет», «Куьредин хабарар», «Ассалам» газетриз акъатзава.
З. Шамсудиновадихъ ялавлу рикIяй атана кхьенвай 300-далай виниз шиирар ава. Абур кьилдин ктаб яз акъудун патал гьазурнава.
Мукьвара З. Къ. Шамсудиновадин 60 йис тамам хьана. И юбилей мубарак авуналди, чаз къелемдин вахахъ мягькем сагъламвал, яратмишунрин рекье мадни еке агалкьунар хьана кIанзава.