30-ноябрдиз «Сулейман-Стальский район» муниципальный райондин администрациядин нубатдин заседание кьиле фена. Адан кIвалахда райондин администрациядин управленийрин, отделрин руководителри, хуьрерин поселенийрин кьилери, идарайрин, организацийрин руководителри, теклифнавай маса юлдашри иштиракна.
Заседание муниципальный райондин Кьил Имам Музамудинович Яралиева ачухна ва кьиле тухвана.
Заседанидал «Муниципальный райондин территорияда капитальный ремонтрин Программа кьилиз акъудун авай гьалдин ва кьабулзавай серенжемрин гьакъиндай» райондин администрациядин капитальный эцигунрин ва ЖКХ-дин управленидин начальник З. А. Гьажимирзоева информация гана. Ада къейд авурвал, район экономикадин жигьетдай вилик тухун, социальный рекьяй агьалийриз хъсан шартIар яратмишун патал эхиримжи 2 йисан къене муниципальный районда социально-экономический метлеб авай объектар эцигунин ва капитальный ремонт авунин рекьерай еке кIвалах тухузва. И рекьерай здравоохраненидин ва образованидин учрежденийриз иллаки екез фикир гузва. И мураддалди райондин администрацияди 2009-йис патал муниципальный инвестиционный Программа туькIуьрна, ам кардикни ква. Ана ЦРБ-дин, культурадин Дворецдин, гзаф школайрин дараматар, майишатрин арайра авай рекьер, трансформаторный подстанцияр, хуьрер эквералди таъминарзавай линияр ва гзаф маса объектар капитальнидаказ ремонт авун къалурнава. И Программа уьмуьрдиз кечирмишун патал пулунин бес кьадар бюджетдин такьатар ахъайнава. Санлай къачурла, ада вири дережайрин муниципальный бюджетдин 73,5 миллион, гьа гьисабдай яз райондин муниципальный бюджетдин 60,6 миллион, хуьрерин поселенийрин муниципальный бюджетдин 13, 4 миллион манат тешкилзава. 2009-йисан 25-ноябрдалди капитальный ремонтрин кIвалахриз 72,7 миллион манат (ида пландин 99,1 процент тешкилзава) пул харжна.
Авунвай кIвалахрикай лугьунихъ галаз санал, З. А. Гьажимирзоев эцигунрин ва капитальный ремонтрин рекьерай гьялиз тахьанвай месэлайрал, рехъ гузвай кимивилерални гегьеншдиз акъвазна. ИкI, ада къейд авурвал, проектдинни сметадин документар гьазурдайла комплексдин эцигунринни ремонтрин вири кIвалахар къалурзавач. Идахъ галаз алакъалу яз сметадик алаваяр кухтуниз мажбур жезва, гуьгъуьнилай пулунин такьатарни бес жезвач.
Райондин культурадин Дворец капитальнидаказ ремонт авун геж жезва, къалурай вахт алатнава. Эцигунрин ва ремонтрин кIвалахрал бес кьадар гуьзчивални тухуз жезвач.
Заседанидал алай месэладай вичин фикирар Имам Музамудинович Яралиева лагьана. Ада къейд авурвал, заседанидал гьялзавай месэла лап важиблуди я. Эцигунрин, ремонтрин кIвалахрив талукь къуллугърин руководителар жавабдарвал гьисс авуналди эгечIун лазим я. ЯтIани, объектар ремонт авунин, цIийи объектар эцигунин кIвалахрив бязи пешекарар рикI гваз эгечIзавач, кIвалахда кимивилериз рехъ гузва. Эцигунардайбурун, ремонтарзавайбурун кIвалахдал райондин администрациядин эцигунрин ва ЖКХ-дин управленидин, талукь маса къуллугърин руководителрин патай бес кьадар гуьзчивал жезвач.
Тапарралди халкьдин пул са нив ятIани нез тун лазим туш, я и кардиз чна рехъни гудач, - тагькимарна эхирдай Имам Музамудиновича.
Заседанидал И. М. Яралиев са жерге маса месэлайрал – къубуяр вахтунда ремонтна акьалтIарунин, хуьрер, рекьеринни куьчейрин къерехар зирзибилдикай михьи авунин, райондин агьалийрин перепись дуьз тухунин, ЦРБ-диз лицензия къачунин ва маса месэлайрални акъвазна, и месэлаяр гьялдай теклифар гана.
Заседанидал гьялзавай месэлайрай анал вичин фикирар райондин администрациядин Кьил Штибег Гьажимегьамедович Мегьамедхановани лагьана.
