Дидейрин йикъан вилик квай йикъара зун Кьасумруьн поселенидин кьил Бремов Брем Керимовичан патав фена ва адаз са Игит дидедикай газетдиз макъала кхьиз кIанзавайдакай лагьана.
-Я стха, вири дидеяр игитар я, кар 10 ва адалай гзаф аялар хунал алач, са аялдиз- инсандиз уьмуьр гайи дишегьлини игит я,- лагьана Брем Керимовича.- Чи поселенида кIвалахзавай, вичиз халкьдин патай гьуьрмет- хатур авай Фарида Гьажимегьамедовнадикай вучиз кхьидач кьван ? Низамлу кьуд веледдин дидени я ам.
Дуьз лагьайтIа, Фарида Гьажимегьамедовна чаз фадлай хъсандиз таниш я. Поселенидин кьили адакай хуш келимаяр лагьайла, чаз мадни шад хьана.
Чун атунин метлеб чир хьайила Фарида Гьажимегьамедовнади вичиз хас тир чинин ачухвилелди лагьана: «-Дишегьли патал дидевал бахт я. Дуьньядиз экв, нур гузвайди, ана кIанивилин ялавар чукIурзавайди, Худадивай чилин винел ислягьвал хьун тIалабзавайдини диде я. Гьавиляй вири дидеяр бахтлу хьурай!».
Вичин сивяй рикIяй къвезвай ихьтин келимаяр акъатай Фарида Гьажимегьамедовна Абдулмежидова (Алиметова), чна винидихъ лагьайвал, 4 веледдин мегьрибан диде я.
Тариф авун туш, адан веледар низамлубур яз чIехи хьанва. ИкI, чIехи руш (адахъ высший образование ава) Наиради Дербент шегьерда Пионеррин КIвале психологвиле, Чингиза Кьасумхуьрел «Ярахмед» ООО-да экономиствиле кIвалахзава, Лейлади Махачкъалада правовой академияда 3-курсуна, Мадинади Агъа-СтIалрин юкьван школада 11-классда лап хъсан къиметар аваз кIелзава. Веледри хьиз, хтул Саидадини Фарида Гьажимегьамедовнадин гуьгьуьлар ачухарзава.
Чил ракъинин нурари, инсан гьакъикъи крари гуьрчегарда лагьайвал, Ф.Абдулмежидовадин уьмуьрдин, зегьметдин рехъни баркалла алайди я. Ада юкьван школа, 1983-йисуз ДГУ-дин филологиядин факультет акьалтIарна, ЦIийи поселокдин юкьван школада муаллимвиле, ВЛКСМ-дин райкомдин 3-секретарвиле кIвалахна, 1989-йисалай инихъ Кьасумхуьруьн поселенидин кьилин заместителвиле кIвалахзава.
Фарида Гьажимегьамедовнадикай кхьенвай и макъала заз шаир Абидин Камилован шиирдин цIараралди куьтягьиз кIанзава:
Дишегьлидин бахт- дидевал- велед я,
Ам хуьн патал гьазур жеда чанни гуз,
«Диде» лугьур гаф дуьньядин абур я,
КуькIвенвай са рагъ я ам даим куз.
