И йикъара райондин образованидин ва илимдин профсоюздин работникрин гьахъ-гьисабдинни сечкийрин 4-конференция кьиле фена. Анал агъадихъ галай месэлайриз килигна:
1. Профсоюздин РК-дин гьахъ-гьисаб.
2. Ревизионный комиссиядин гьахъ-гьисаб.
3. Райондин профсоюздин организациядин председатель хкягъун.
4. Ревизионный комиссия хкягъун.
5. Республикадин профсоюздин организациядин 4-конференциядиз делегатар хкягъун.
Конференциядин кIвалахда «Сулейман-Стальский район» муниципальный райондин администрациядин крар идара ийизвайди тир М. К. Наджафова, образованидин ва илимдин работникрин профсоюздин рескомдин тешкиллувилин отделдин зеведиш М. Х. Махулова, райондин школайрин профсоюздин комитетрай хкянавай 85 делегатди иштиракна.
Конференциядал алай сад лагьай месэладай – «2004-2009-йисара райондин образованидин ва илимдин профсоюздин райкомди тухвай кIвалахдикай» гьахъ-гьисабдин доклад адан председатель Х. Ж. Халилбекова авуна. Ада къейд авурвал, профсоюздин асул везифаяр гьа садбур яз ама: образованидин работникрин социально-экономический интересар, зегьметдин ихтиярар хуьн, абурун гьакъиндай къайгъударвал авун. И рекьерай профсоюздин райкомди тайин кIвалах тухвана, и кар гележегдани давамда.
Конференциядал профсоюздин райкомдин ревизионный комиссиядин председатель Э. Ибрагьимован докладдихъни яб акална.
Анал гьялзавай месэладай РУО-дин начальник Ж. А. Асланова, КIахцугърин, КIварчагърин СОШ-рин профсоюздин председателар тир М. А. Абдурашидова, Н. Къ. Къурбанова, ДаркIуш къазмайрин СОШ-дин директор С. Д. Савзиханова чпин фикирар лагьана.
М. Х. Махулова конференциядин делегатар Дагъустан Республикадин образованидин ва илимдин работникрин профсоюздин республиканский организацияди образованидин работникрин ихтиярар хуьн патал республикадин ва федеральный дережада тухузвай кIвалахдихъ галаз танишарна, делегатрин патай хьайи суалриз жавабар гана.
Конференциядал 33 касдикай ибарат яз райондин образованидин ва илимдин профсоюздин цIийи комитет, адан председателвиле Х. Ж. Халилбеков хкягъ хъувуна.
Эхирдай анал РУО-дин начальник Ж. А. Асланов ва райондин образованидинни илимдин профсоюздин организациядин председатель Х. Ж. Халилбеков республикадин профсоюздин организациядин 4-гьахъ-гьисабдин конференциядиз делегетар яз хкяна.
