Чи район тIебии газдалди таъминарна гзаф йисар я. Ида агьалийриз гзаф регьятвилер, къулайвилерни яратмишна.
Лагьана кIанда хьи, райондиз газ гъизвай йисара хуьрериз ва хуьрерин куьчейриз линияр республикадин талукь организацийри тухвана. Гила малум жезвайвал, бязи хуьрера газдин линияр тухудайла истемишунрал амал авунач: куьчейра шуькIуь турбаяр тухвана, абурун даяхрин пунара цементдин къаришма цанач, даяхар яз ракьун тIвалар акIурна... Ида хуьрерин агьалийрин патай гьахълу наразивилерни арадал гъизва. Районда гуьзел чкадал экIя хьанвай КIварчагъ-рин, Экенрин, НуьцIуьгърин ва Зизикрин хуьрерин агьалийрикни газдихъ, куьчейра тухванвай турбайрихъ, газ бес тахьунихъ галаз алакъалу месэлайри къалабулух кутазвайдакай чаз ванер-сесер хьанай. Чун инанмиш хьайивал, наразивилер, мумкин я талукь чарар-арзаярни райондин руководстводални агакьна. ИкI, мукьвара «Куьредин хабарар» газетдин редактор А. А. Миметоваз ва и цIарарин автордиз муниципальный райондин администрациядин Кьил Ш. Гь. Мегьамедханова вичин патав эверна ва КIварчагъ дередин хуьрера газдин месэла гьикI аватIа чирунин патахъай тапшуругъ гана. Чун тадиз вичиз къуччагърин дере лугьузвай КIварчагъ дередин хуьрериз фена, КIварчагърин поселенидин кьил Сефиханов Асланбегахъ, ина цIийиз газдин линияр тухузвай «Газстройсервис» ООО-дин директор Абдиев Къазиханахъ, гзаф агьалийрихъ галаз гуьруьшмиш хьана.
А. Сефиханова чаз лагьайвал, КIварчагъ дередиз газ гъайиди ва хуьрерин куьчейра газдин линияр тухвайди «Строитель» ООО я. Турбаярни чпиз кIандайвал, истемишунриз жаваб тагудайвал тухвана. Хейлин чкайра лазим кьадардинбурулай гъвечIи диаметрдин турбаяр тухвана, гьавиляй къе гзаф агьалийрин кIвалера газ бес жезвач.
Чаз акурвал, хейлин куьчейра цавай тухвана кIанзавай турбаяр линийрик даяхар яз акIурнава.
И ва рехъ гайи маса татугайвилер, кьилинди агьалийриз газ бес тахьун себеб яз, агьалияр райондин ва республикадин талукь идарайриз арза-ферзе авунизни мажбур хьана.
Чна винидихъ лагьайвал, КIварчагъ дередин хуьрера, мадни дуьз лугьун хьайитIа, гзаф куьчейра гила газдин линияр цIийи кьилелай хутахзава. И кардални «Газстройсервис» ООО машгъул я. И карханадин директор Абдиев Къазихан Айвазовичахъ галаз чун НуьцIуьгърин хуьре таниш хьана.
- Виликдай чун «Сыртычгаз» ООО-дик квайди тир, гила чи «Газстройсервисдикай» кьилдин организация хьанва, - лугьузва Къ. Абдиева. - КIвалахни чна аукционрин бинедаллаз ийизва. КIварчагъ дереда газдин линияр тухунин кIвалахар чна хуьруьн поселенидин администрациядихъ галаз меслятна тухузва. Сифте нубатда турбаяр ветеранар, тIимил таъмин тир, гьакIни гзаф аялар авай хзанар яшамиш жезвай куьчейра тухузва.
Чун НуьцIуьгърин хуьре цIийиз турбаяр тухванвай са шумуд куьчеда къекъвена. КIвалах еридивди авунвайди гьасятда кьатIуз жезва. Карханадин устIаррин кIвалах-дилай агьалийрини разивал ийизва.
Къ. А. Абдиева чаз лагьайвал, куьруь са вахтунда «Газстройсервис» ООО-ди КIварчагъ дередин хуьрера газдин линияр тухунин рекьерай 3 миллион манатдин къимет авай кIвалахар тамамарнава.
Куьчейра турбаяр тухунин кIвалахар давам жезва. Чаз умуд кутаз кIанзава хьи, гьаваяр мекьи жедалди, кьуьд алукьдалди ООО-дин коллективди чпин вилик акъвазнавай кIвалахар тамамарна акьалтIарда.
Газдин месэладикай рахадайла ихьтин са кардикайни лугьуз кIанзава. 2009-йисуз Дагъустан Республикада шегьерарни хуьрер газламишунин гьакъиндай ДР-дин Гьукуматди тестикьарнавай махсус программа авайди я. Гила малум жезвайвал, ам уьмуьрдиз кечирмишунин карда республикадин хуьрериз газдин линияр тухунал машгъул организацияди са жерге кимивилериз рехъ гана. Мадни, и кардив райондин виликан руководствони жавабдарвал гьисс авуналди эгечIнач. Абуру рехъ гайи кимивилер, газдин линияр тухудайла ахъагъай нукьсанар райондин гилан руководство арадай акъудуниз мажбур жезва. Лагьана кIанда хьи, и рекьерай районда еке кIвалах тухузва. И кар чаз КIварчагъ дередин хуьрера тухузвай кIвалахдай ачухдиз аквазва.
Чаз малум хьайивал, райондин руководстводихъ 2010-йисуз райондин газ авачир гуьнепатан хуьрер (Уллу Гъетягъар, Шихидхуьр, Сайтархуьр, Вини ва Агъа Хъартасар, Асалдхуьр ва масабур) тIебии газдалди таъминардай фикир ава. И кар патал къайгъуярни аквазва.