Чи рекьера бедбахтвилер, машинар сад-сада акьунар, туькьуьлвилерни зиянар арадал атунин дуьшуьшар гзаф жезва. Себебарни чаз чизва: куьчейрани рекьера транспортди гьерекат авунин къайдайрал амал тавун, машинар кьадарсуз йигиндиз гьалун, ички хъвана рулдихъ ацукьун ва масабур. Рекьерин знакар алатIани, гзафбуру машинар ихтияр тагузвай чкайрал акъвазарзавай дуьшуьшарни тIимил туш. ИкI, мисал яз, ЦIийи хуьре ЦРБ-дин вилик транспортдин такьатар акъвазардай ихтияр авач лагьана рекьерин знакар эцигнава. Гьайиф хьи, абурал гзафбуру амал ийизвач. Больницадин вилик инсанар акьадариз «Газелар», «таксияр», туьквенрай шейэр къачузвай инсанрин, гьакIни больницадиз азарлу кас гъайи, анай хутахзавай инсанар гуьзетзавайбурув гвай машинарни яргъалди, гьатта сятералди акъавазнаваз жезва. Абурал чна и рекьяй агъадалди – винелди физвай машинар, гьерекатдик квай цIудралди инсанар алава хъийин. Ида хаталувал арадал гъизва.
ЦРБ-дин вилик къайда тваз алахъунар ийиз чаз са шумудра милициядин работникарни акуна. Абур хъфенмазни, машинар кIватI хъижезва.
Са чIуру кар-кIвалах, бедбахтвал жедалди, талукь къуллугъри ЦРБ-дин вилик къайда тунайтIа, хъсан кIвалах жедай.