Къадимова Силвиради 2003-йисалай инихъ ДаркIуш къазмайрин культурадин кIвалин директорвиле кIвалахзава. Вичин намуслу зегьметдалди и йисара жегьил пешекарди хуьруьнвийрин патай еке гьуьрмет къазанмишнава.
С. Къадимовади чаз лагьайвал, культурадин кIвали вичин кIвалах виликамаз туькIуьрнавай пландин бинедаллаз кьиле тухузва.
Чаз акурвал, ина агитациядин такьатриз еке фикир ганва. Цларал алай «СтIал Сулейманан 140 йис», «Байрам Салимован 80 йис», «Мирземет Салманован 60 йис», РФ-дин лайихлу артист А. Сайдумоваз, СССР-дин лайихлу нефтяник Ш. Шихвердиеваз, алимар тир бубани хва Усман ва Мегьти Шабановриз, СССР-дин лайихлу юрист С. Гьамидоваз талукьарнавай, «Чи хуьруьн тарих», «ЧIехи Гъалибвилин 65 йисан къаршидиз» ва маса стендар метлеблубур, фикир желбдайбур хьанва.
Столрал алай центральный ва республикадин газетрикайни журналрикай, гьабурукай яз «Лезги газет», «Куьредин хабарар» газетрикай иниз гьар юкъуз къвезвай цIудралди хуьруьнвийри менфят къачузва.
Культурадин кIвале художественный самодеятельностдин коллектив, са шумуд кружок кардик ква. Хуьруьн библиотекадин зеведиш, ДР-дин культурадин лайихлу работник Саидин Кичибеговахъ галаз санал Силвиради жуьреба-жуьре мярекатар-вечерар, гуьруьшмиш хьунар, кIелзавайбурун конференциярни кьиле тухузва. С. Къадимовади чаз лагьайвал, алай вахтунда ина райондин 80 йисан юбилейдиз талукьрнавай шадвилин мярекат тухуниз гьазурвилер аквазва.
