Сив хуьн (араб чIалал савм ва я сыям) са куьнуькай ятIани жув акъвазарун лагьай чIал я. Рамазандин варз сив хуьн-им мусурман Аллагьдиз мадни мукьва жезвай, адан алатай вахтарин гунагьрилай гъил къачузвай вахт я. Алейсалам Мегьамед пайгъамбарди лагьана: Гьи касди Рамазандин вацра ихтибарлудаказ ва умудлудаказ сив хуьзватIа, адаз алатай вахтарин гунагьар гьалалзава.
Рамазандин варз - им инсандин руьгьни беден азад ва михьи жезвай пак варз я, и вацра инсанди вич агъайнадаказ гьиссда. Эхь, и варз санлай дуьньядин винел яшамиш жезвай миллиардни зур мусурманар тупламиш ийизвай, абурун арада стхавилин, дуствилин алакъаяр мягькемарзавай варз я.
Рамазандин вацран 27-югъ алукьзавай йиф виридалайни «зурба йиф яз», инсанрин кьадар-кьисмет гьялзаваи йиф яз гьисабзавайди я. Араб чIалалди и йифиз «Лейлят ал-къадр» лугьузва. Гьа и йифиз Аллагьди, Жабраил малаикдив вугана, Алейсалам Мегьамед пайгъамбардиз Къуръан ракъурна. Первердигарди гьа йифиз гьар са инсандин гьакъиндай къарар кьабулзава, ада вичин къаншарда авур дуьаяр, тIалабунар гьисаба кьазва. Сив хуьнин варз (29 ва я 30 югъ) куьтягь хьун шаввал вацран сад лагьай йикъал гьалтзава. И югъни сувар хьиз къейдна кIанда. Адет яз, сувар 3-4 юкъуз давам жеда. Сив хуьнин суварин юкъуз кесибриз, юхсулбуруз, етимриз садакьа гана кIанда. А садакьадиз закат лугьуда. Закат хизандин гьар са члендин кьилиз гуда. ГьакI гуьгьуьллудаказ мискIиндизни адан дердияр патал куьмекдин гъил яргъи ийида. Сувар гьарда вичин хизан галаз къейдда. Суварин хуьрекрик къуни-къуншини кутада. Сувариз мискIинда, гьакI ачух майданрал дуьаяр кIелда.
Аллагьдин къаншардиз ибадат авурдалай гуьгъуьниз инсанар регьметдиз фенвай чпин багърияр рикIел хкун патал сурарал фида, абурун руьгьдиз дуьаяр бахшда.
Суварин юкъуз сада-сад тебрикда. Араб чIалалди а тебрикдин гафар ихьтинбур я: «Такаббаль Алла мина ва минкум», яни «Первердигар чна вич паталди ийизвай чалишмишвилерилай рази хьурай». Мукьва-кьилияр ва къуни-къуншияр сад-садан кIвалериз фида, суварин суфрадал алай шейэр дадмишда, пишкешар гуда. Суварин йикъар, халис сувар хьиз, шаддиз кьиле тухуда.
Алай йисуз сив хуьнин суварин югъ 20-сентябрдал гьалтзава.
Квез алукьзавай сив хуьнин сувар мубаракрай! Куьне хвейи сивер Аллагьди кьабулрай! Къуй куьн Аллагьдин регьимдик кваз хьурай, играмибур!
