1-июндиз ЦСПСД (Центр социальной поддержки семьи и детей) идарадин дараматда Виридуьньядин аялар хуьдай йикъаз талукьарнавай шадвилин межлис кьиле фена. Аниз УСЗН-дин работникриз, хуьрерай тIимил таъмин тир хзанриз, диде-буба кьилел аламачир, гьакIни инвалид аялриз теклифнавай. Абуруз гьар жуьредин ширинлухар, сокар алай столар туькIуьрнавай.
Шадвилин межлис ЦСПСД-дин пешекар Тагьирова Сефията ачухна ва кьиле тухвана. Ада кIватI хьанвайбуруз вири работникрин ва вичин патай Виридуьньядин аялар хуьдай югъ мубаракна ва сифте гаф директордин заместитель Алиева Имара Алиевнадиз гана. Вичин рахунра ада ЦСПСД-дин работникри ийизвай кIвалахдикай куьрелди лагьана ва кIватI хьанвай вири аялриз, абурун диде-бубайриз сувар мубаракна.
Межлисдал УСЗН-дин отделдин зеведиш Магьмудова Шамсият, анин пешекар Къазимегьамедова Ася ва масабур рахана.
Абуру вирида и мярекатда кIватI хьанвай аялриз ва абурун диде-бубайриз Виридуьньядин аялар хуьдай югъ мубаракна, гьакIни чи гьукуматди халкьдин, гьа жергедай яз аялрин гьакъиндай къайгъударвал артухарнавайди, райадминистрацияди аялрин гьакъиндай къайгъударвал йисандавай-суз аквадай гьалда хъсанарзавайди, алай йисуз школайриз, ясли бахчайриз, больницадиз райондин администрацияди ахъайзавай пулунин такьатар хейлин артухарнавайди, сифтегьан классра кIелзавай аялриз чими тIуьнар гузвайди лагьана.
Мярекатдал диде-бубайрин патай диде-буба амачир хтулар тербияламишзавай Къарабегова Нажабат, шаир Къурдулов Бугьадин рахана. Эхиримжида анал вичин са шиирни кIелна. Мярекатда иштиракай аялриз, диде-бубайриз пишкешарни гана.
Гьар сад рахайдалай гуьгъуьниз ЦСПСД-дин работникрин куьмекдалди аялри гьазурнавай шииррин композиция межлисдин иштиракчийри хушвилелди кьабулна.
Спонсорвилин куьмек и мярекатдиз Абдулгьамидов Назира, Манатилов Мадрида, Мейланов Наримана, Аскеров Максима ва Къачаев Магида гана.
Чаз чи ЦСПСД-дин работникрин патай ихьтин мергьеметлу крариз куьмек гунай абуруз чухсагъул лугьуз кIанзава, - лагьана директордин заместитель Алиева Имара Алиевнади.
И мярекат аялрин рикIел аламукьдайди хьана.
