Алай вахтунда Курхуьруьн Мирзекерим Рагьимован тIварунихъ галай сад лагьай нумрадин юкьван мектеб акьалтIарай жегьилрикай хейлин гадайрини рушари жуьреба-жуьре шегьеррин вузра кIелзава. Абурун жергеда Расулова Альфия Алисултановнани ава.
Альфияди хуьруьн мектеб 2012-йисуз лап дерин чирвилер аваз акьалтIарна. Ам мектебдин истемишунар галай-галайвал хъсандиз кьилиз акъудай кас я. Ихьтин хесетар адак, сифте нубатда кIвалин тербияди ва классдин руководитель, тежрибалу муаллим Абдуразакьова Мая Эфендиевнади кутурдал шак алач.
Мектеб куьтягьай Альфия энгел тавуна уьлкведин Кеферпатан меркез тир Санкт-Петербургдиз фена ва инин юридический академиядик экечIна. Исятда Альфия 3-курсунин студентка я, кIелни ада лап хъсандиз ийизва, общественный уьмурдани академияда активвилелди иштиракзава. Нетижа къалурзавай делилрикай сад и йикъара академиядин ректор О. С. Зыбинан къул, печать алаз хтанвай чухсагъулдин чарчи шагьидвал ийизва.
Чар мектебдин директордин тIварцIихъ хтанва. Ана икI кхьенва:
«Гьасанбеков Мегьамедкерим Къахримановичаз!
Юридический академиядин ректоратди квез ва вири педагогический коллективдиз Расулова Альфия Алисултановна лап хъсан тербия, чирвилер аваз гьазурунай чухсагъул малумарзава. Ада юриспруденциядин факультетда кIелзава.
Им куьн коллективди кIелунинни тербиядин кIвалах мектебда еридивди, вини дережада эцигунин нетижа я.
Россияда жегьилриз тербия, чирвилер гуник хсуси пай кутуниз еке къимет гузва. Гележегдани яратмишунра агалкьунар, гъалибвилер хьурай. Ректор О. С. Зыбин».
Гьелбетда, ихьтин чухсагъулди мектебдин коллективдик мадни хъсандиз зегьмет чIугунин ашкъи гьевес кутунва. Альфия хьтин акьуллуяр инай мадни майдандиз акъатда.
Райсудин Набиев, муаллим, зегьметдин ветеран.
