Муниципальный райондин
Кьил, райондин депутатрин Собранидин Председатель Абдулмуталибов Нариман Шамсудиновичаз:
Хайи чIал хьиз, хайи чил хьиз,
Газетни Квез ала я.
Гьар са кардай Квел меслят гъиз,
Чаз алакъа багьа я.
Райондин суддин Председатель, Федеральный судья Айбатов Мегьамедзаид Мегьамедмирзоевичаз:
Куь кIвалахди, хуш къилихди
Халкьдин патай гьуьрмет гъанва.
Ветеранриз газетар кхьин
Гьар йисуз Квез адет хьанва.
Райондин прокурордин везифаяр тамамарзавайди тир Акимов Фархад Замидиновичаз:
Чи районда низам-къайда
Хуьн паталди алахънавай,
Кхьида чаз мукьвал-мукьвал
Тухузвай гьар кIвалахдикай.
ЦРБ-дин кьилин духтур
Ханбалаев Максим Играмудиновичаз:
ЧIехи девлет – сагъламвал хуьн
Пак буржи яз хивевай,
Гьар йисуз чи газет кхьин
Алуддач на рикIелай.
Райондин культурадин отделдин начальник Бабаханов Майрудин Бабахановичаз:
Хъсан кар я гьар са кIвалах
Чидай касдин гъиле хьун.
Са бахт я кас гвачир дамах,
Культурадин кьиле хьун.
Райондин образованидин управленидин начальник Османова Индира Гьажибалаевнадиз:
Муаллимрин регьбер яз Куьн
Алахъунар пара я.
Чи газетдихъ Куь алакъа
Чаз важиблу, багьа я.
Кьасумхуьруьн почтамтдин отделенидин начальник Насруллаева Серьеза Султанагьмедовнадиз:
Почтамтдин кIвалах даим
Къайдадик кваз акваз жеда.
Мел-мехъерик, рекье-хуьле
Подпискадкай рахаз жеда.
РФ-дин ДР-да авай пенсионный фондунин райондин отделенидин начальник Алдеров Алдер Абдулаевичаз:
Агьалийриз пенсийрин пул
Вахтунда гуз алахънавай,
Акур кас лап мягьтел жеда
Низам-къайда кIвалахдавай
УСЗН-дин начальник Бремов Жавидин Бремовичаз:
Агьалийрин къайгъуйрик квай,
ЧIехи-гъвечIи талгьана,
Са векъи гаф акъатдач вай,
Я - «ваъ», «жедач»... - лагьана.
ЦIийи поселокдин СОШ-дин директор Ягъибегов Бег Абдулашимовичаз:
ЧIехи мектеб аваз хиве,
Къайгъуйрик квай, гвачир дамах,
Рекьевайда атIуда рехъ,
Кьиле фий ви гьар са кIвалах.
ДаркIушкъазмайрин СОШ-дин директор Савзиханов Савзихан Жамалдиновичаз:
«Муаллимрин ансамблдин»
Дирижер яз машгьур тир ад,
Мурад я чи, амадаг, Куьн
Яшар хьунухь са вишни къад.
Сийидрин хуьруьн СОШ-дин директор Исаев Ямудин Мегьамедовичаз:
Аста рахун, къилих умун,
Хуш хесетар ганва Квез.
Гьар гьафтедин газет вахчуз
Редакциядиз жеда къвез.
Асалдхуьруьн тамам тушир юкьван школадин директор Баламетова Тамамат Зейнудиновнадиз:
Хуьруьн тарих чирун патал
Югъ-йиф талгьуз гелевай,
Агалкьунар мадни хьуй Квехъ
Алай йисуз гъилевай.
«Россельхозбанкдин»Кьасумхуьруьн алава офисдин управляющий Манатилов Мадрид Мегьамедагъаевичаз:
Хъсан къунши хьайи чIавуз
КьецIи рушни фида гъуьлуьз.
- Чун тахьайла, вуж хьуй, - лугьуз,
Жеда хайи газет кхьиз.
Кьасумхуьруьн 1-нумрадин ДЮСШ-дин директор Мирзалиев Сергей Мирзалиевичаз:
Спортдал желб авун патал
Чи жегьилар датIана,
Газетни са даях тирди
Куьне лап дуьз кьатIана.
Кьасумхуьруьн аялрин ясли-бахчадин заведующий Мейланова Тавсият Рамазановнадиз:
Им шумуд йис чи балайриз,
Дидеди хьиз, къуллугъзавай,
БицIекар гваз акуй Куьн чаз
Гьар суварриз алукьзавай.
Суварин дуствилин шаржар кхьейди Абидин Камилов я.
