Ингье, 2015-йисни вичин тарихдиз фена. Ам чи район экономикадин, социальный, культурадин рекьерай вилик финин жигьетдай лишанлуди хьайиди хьиз, чи редакциядин коллектив патални бегьерлуди хьана. Вичин тешкилатчи райадминистрация тир чи райондин общественно-политический газет «Куьредин хабарар» адан коллективди вахт-вахтунда акъудун ва вахтунда агьалийрал агакьарун таъминарна.
План тир 52 нумрадин чкадал алатай йисуз чна 82 нумра газетар акъудна. Райондин уьмуьрда кьиле физвай важиблу вакъиаяр, лишанлу мярекатар, жезвай агалкьунар ва гьакIни авай кимивилер къейд авунихъ галаз санал, газетди РФ-дин ва ДР-дин са бязи Законар, Гьукуматрин, муниципальный райондин, райондин депутатрин Собранидин, администрациядин къарарар райиж авунин ва абур уьмуьрдиз кечирмишунин жигьетдай талукь кIвалах тухвана. Гьелбетда, чаз чи кIвалах вилик тухунин карда гьам пулунин герек такьатар чара авуналди, гьамни дуьз меслятар къалуруналди муниципальный райондин Кьил Абдулмуталибов Нариман Шамсудиновичан патай еке куьмек хьана. Райондин руководстводихъ галаз агьалийрин чарарин алакъа ва гьакIни гуьруьшмишвилер мягькем хьуни гзаф йисара гьялиз тахьанвай са жерге месэлаяр къарагъардай ва талукь серенжемар кьабулдай мумкинвал гана.
Газетдин чинра жуьреба-жуьре месэлаяр къарагъарунин жигьетдай чи куьмекчияр-чи газетдин «вилерни япар» тир хуьрерин мухбиррикай еке куьмек жезва. Абурун жергедай яз къе Россиядин Печатдин йикъан сувариз чаз чахъ галаз гзаф йисара сих алакъа хуьзвай, чи умудлу даяхар тир Сажидин Саидгьасанован, Майина Абдулмуталибовадин, Шагьабудин Шабатован, Мегьамед Мегьамедован, Эйзудин Сайдумован, Саид Саидован, Райсудин Набиеван, Зейнулагь Наврузован, Замир Мегьамедован ва гзаф масабурун тIварар еке гьуьрметдивди кьаз кIанзава ва абуру алукьнавай цIийи йисузни и алакъа мадни мягькемардайдак умуд кутазва. Чна абурулай, хуьрера кьиле физвай хъсан кIвалахрикай хьиз, авай кимивилер арадай акъудунихъ, герек меслятар къалурунихъ рекье тунвай макъалаярни гуьзлемишзава. Эхь, газет анжах са ана кIвалахзавай журналистринди туш, ам вири халкьдин газет я, ада райондин агьалийрин вири къатариз къуллугъ авун, и жигьетдай куьмек гун, дуьз рехъ, меслят къалурун герек я.
Гьар йисара газетдин редакторар яз кIвалах авур Мемей Эфендиеван, Паша Исаеван, Сейфула Гьабибован, Мегьамеднаби Набиеван, МутIагьир Разаханован, Гьажи Аликберован, Къурбан Мамедован, Жалал Аллагьвердиеван, Саид Алиметован, Загьидин Къазанбегован, гьакIни дяведин иштиракчияр тир Играмудин Ханбалаеван, Абдусемед Гьабибуллаеван ва масабурун экуь къаматар рикIел хкуналди, чаз пешекарвилин сувар – Россиядин Печатдин югъ гзаф йисара редактор яз кIвалах авур Сейфудин МутIалибоваз, гьакIни Анварбег Миметоваз, алай вахтунда редактор яз кIвалахзавай Мирземет Наджафоваз, редакциядин вири коллективдиз, чи ветеранриз рикIин сидкьидай мубарак ийиз кIанзава. Къуй квехъ виридахъ чандин сагъламвал, руьгьдин кIубанвал, хзанрани ислягьвал ва мублагьвал хьурай!
Алатай Литературадин йис чна уьзуьагъвилелди рекье туна. Виликамаз планламишайвал, Литературадин йис РДК-да шад гьалара ачухна, гьа и юкъуз гьакI райондин краеведческий музейни ачухна. Яратмишдай интеллигенциядин векилрин гуьруьшмишвилер тешкилна, юбилеяр кьиле тухвана, конкурсар малумарна, СтIал Сулейманан Шииратдин югъ, ЧIехи Гъалибвилин 70 йисан мярекат шад гьалара кьиле тухвана, Дербентда СтIал Сулейманаз гуьмбет ачухна, Дербентдин 2000 йисан мярекат еке дережада аваз кьиле фена. Октябрдин варз Гьасан эфендидин яратмишунрин варз яз кьиле тухвана, лезги чIалалди чапдай акъуднавай адан «Асари Дагъустан», гьакIни 80 дахъ агакьна чи шаиррин ва писателрин ктабар акъудна.
Идахъ галаз сад хьиз, райондин руководстводин регьбервилик кваз «Куьредин ярар» культурадин макандин 25 йисан юбилей, гьакIни Куьре Меликан 675 йис тамам хьун шад гьалара къейдна. Шаир ва драматург Абдулбари Магьмудован 85 йис тамам хьунихъ галаз алкъалу яз ЦIийи Макьарал ам яшамиш хьайи кIвалер авай куьче адан тIварцIихъ яна, фотожурналист ва писатель Тажидин Мегьамедован 75 йис тамам хьунихъ галаз алакъалу яз РДК-дин банкетрин залда адан шикилрин чIехи выставка ачухна ва икI мад…
Вири и ва маса мярекатрин гьакъиндай агьалияр газетдай хабардар авуна.
Алукьнавай 2016-йис чи райондин уьмуьрда са жерге лишанлу вакъиайралди девлетлу я: цIи чи райондин «Куьредин хабарар» газет тешкилайдалай инихъ 85 йис, чIехи алим, шаир ва камалэгьли Рухун Алидин 345 йис, шаирар тир Дашдемир Адилован 90 йис, Ибрагьим Гьуьсейнован 80 йис, Вадим Жамалдинован 75 йис, Фейзудин Нагъиеван, Шагьабудин Шабатован, Абидин Камилован 65 йисар, медениятдин векилар тир Сейфулагь Керимован 95 йис, Верзант Мегьамедован 80 йис, Эседуллагь Наврузбегован 75 йис, Ярагьмед Ярагьмедован 60 йис тамам жезва
Чи вилик и жигьетдай къейд ийидай са жерге маса месэлаярни акъвазнава. Райондин руководстводин ва талукь маса къуллугърин куьмекни галаз чна абур галай-галайвал ва вини дережада аваз кьилиз акъуддайдак ва и кардал агьалийрин гегьенш къатар желб ийидайдак кIевелай умуд кутазва.
Алукьнавай цIийи йис Россиядин Федерацияда Кинодин йис яз малумарнава. И кардини культурадин хиле кIвалахзавай вири работникрин вилик, гьа жигьетдай чи редакциядин коллективдин виликни, еке ва жавабдар везифаяр эцигзава. Чпиз райондин руководстводи к1валахдин вири шартIар яратмишнавай редакциядин работникри абур агалкьунралди кьилиз акъудайдал шак алач.
Ингье, алай йисан чи газетдин нубатдин 1-нумрада къейднавайвал, газет акъудиз эгечIай 1931-йисалай башламишна къенин йикъалди акъуднавай вири нумрайрин умуми кьадарди 26089 тешкилзава. Эхь, чи райондин газет тарихдин яргъал ва баркаллу рехъ фенва, и кардал гьар са районэгьлидивай дамах ийиз жеда. Гьа са вахтунда, шаирринни камалэгьлийрин макан тир чIехи шаир СтIал Сулейманан тIварунихъ галай 60 агъзурдалай виниз агьалияр яшамиш жезвай районда алай йис патал 2 агъзур газет кьванни кхьин тавун тажуб жедай кар я. И карди чун хайи дидед чIал, чи бубайрин баркаллу крар ва адетар хуьнив эгечIзавай гьалдин гьакъиндай ачухдиз шагьидвалзава. Гьар дережайрин къуллугърин руководителри и кардиз фикир гун герек я.
Вири районэгьлийриз алукьнавай ЦIийи йис мубарак авунихъ галаз санал чаз абурухъ чандин сагъвал, кIвалахда агалкьунар, хзанрани бахт, берекат хьана кIанзава.
А. Камилов, «Куьредин хабарар» газетдин редактордин заместитель.
