Къадим лезги халкь вири девирра чпихъ кьетIен хатI авай шаирралди, писателралди, ашукьралди, музыкантралди, манидарралди машгьур хьайиди я.
Пешекар, яни гьа рекьяй кIелнавай музыкант, манидар тушиз, халкьдин арада сейливал, кIанивал къазанмишун – им мадни еке агалкьун я. Анжах са чпиз хас тир тегьерда устадвилелди манияр лагьай Ражаб Сафарован, Жамал Шагьмарданован, Эслихан Агъаевадин, Гьабибулагь Мансурован, Исамудин Межидован, Бесхалум Гьажиевадин ва масабурун тIварар къени инсанрин рикIера ама.
СтIал Сулейманан райондани гьевескар манидарар вилик йисарани авай, гилани ава: Гьажибала Жигеров, Мусинат Нуралиева, Керим Камилов… Абурун арада Агъа СтIалрин къазмайрилай тир Рагьман Мурадовани лайихлу чка кьазва. Пешедикай рахайтIа, ада «Сулейман-Стальское ДЭП-32» ОАО-да кьилин инженервиле кIвалахзава.
Гьа са вахтунда, алай йисуз вичин 60 йисан юбилей къейд авур Р. Мурадов хъсан чIагъанчи ва бажарагълу манидарни я.
Са межлисдал, Р. Мурадован алакьунар ва устадвал акурла, зи фикирдиз ихьтин кьуд цIар атанай:
ЧIагъан ягъиз, мани лугьуз,
Вуч ширин я, Рагьманан сес?!
Яб гузавай гьич садани
Лугьуч адаз: «Акъваз, я бес».
Чаз малум хьайивал, Рагьмана гьеле школада кIелзавай йисарилай чIагъан, далдам язава ва манияр лугьузва. Жегьил йисара ам мел-мехъеррални гзаф хьана.
Гьевескар музыкант ва манидар яз Р. Мурадова районда тухузвай шадвилин саки вири мярекатра иштиракзава, агьалийрин гуьгьуьлар шадарзава. Адан алакьунриз гьакIни Махачкъалада, Каспийскда, Дербентда, Ахцегьа, Усугъчайда, Кьурагьа ва маса чкайрани тамашачийри капар яна.
Устадвилелди чIагъан ягъуналди, ширин сесиналди манияр лугьуналди, Рагьман Мурадова чи шаирринни писателрин, машгьур маса ксарин юбилейрин ва маса мярекатар гурлу ийизва, гаф-чIал чидай тамада яз, мярекатарни кьиле тухузва.
Рагьман Мурадовакай и макъала кхьидайла, зи рикIел Польшадин литературадин машгьур векилрикай сад тир Альфред Конара лагьай гафар хтана: «Бажарагъ валай гьич садани чир тавунвай тайин са кIвалах ийиз алакьун я».
Маса гафаралди лагьайтIа, бажарагъ шукур хьайи Халкьди инсандиз гузвай пай я. Амма ихьтин «ядигар» виридаз кьисмет жезвач. Мисал яз, гьар нивай хьайитIани шиирар теснифиз, манияр лугьуз, суьретдал чан гъиз жедач. Ибур анжах чпихъ акьалтIай алакьунар авайбурун крар я. Бажарагъ аламатдин затI я. Ам, лежберди никIе цанвай къуьлуьн твар хьиз, фараш жезва ва, са кьадар вахт алатайла, ада бегьер гузва. И кар чаз гьевескар музыкант ва манидар Р. Мурадован уьмуьрдин ва яратмишунрин рекьиз вил вегьейла мад сеферда якъин жезва.
КIвалахда хьиз, Р. Мурадовахъ агьалийрин руьгьдин игьтияжар таъминарунин кардани агалкьунар хьун чи мурад я.
