ЧIехи Октябрдин революция гъалиб хьайи пуд лагьай юкъуз тешкилай советрин милиция баркаллу рехъ фена. «Россиядин агъзурралди рухвайри ивияр экъична, чанар пучна, къазанмишай девлетар хуьн вахъ ихтибарзава, яру миллиционер!» - лагьанай къенепатан крарин халкьдин комиссариатдин сифтегьан приказрикай сана.
Гьа ихьтин сифтегьан милиционеррин несилдикай яз чавай «СССР-дин НКВД-дин лайихлу работник» гьуьрметлу тIварцIин сагьиб, ДАССР-дин МГБ-дин бандитрихъ галаз женг чIугвадай отделдин начальникдин заместитель, ДАССР-дин ОБХСС-дин начальник, ДАССР-дин МВД-дин НКВД-дин Кьасумхуьруьн, Хив, Дакъузпара райотделрин начальник хьайи Сердер Жамиевич Гьамидован тIварни кьаз жеда.
Мадни са кар ава: вичин савадлу вири уьмуьр халкьдиз, Ватандиз къуллугъ авуниз бахш авур С. Ж. Гьамидован алай йисуз 100 йисни тамам жезва.
Регьметлудан руьгьдиз гьуьрмет авуналди, агъадихъ чаз адан уьмуьрдин ва къуллугъдин рекьикай суьгьбет ийиз кIанзава.
С. Ж. Гьамидов 1915-йисан 21-декабрдиз Кьасумхуьруьн райондин ДаркIушрин хуьре дидедиз хьана.
ЦIемуьжуьд йиса авай жегьилди зегьметдин рехъ вичин дахдихъ галаз Баку шегьердин Артем островдин нафтIадин мяденра буругъдин слесардин куьмекчивилелай башламишна. 1935-йисуз ватандиз хтай ада ДаркIушрин хуьруьн Советдин секретарвиле, гуъгъуьнлай Кьасумхуьруьн райисполкомда деловодвиле кIвалахна.
1936-йисан 7-июлдиз ам НКВД-дин Кьасумхуьруьн райотделда секретарь-счетоводвиле кьабулна. 1939-йисан 15-майдиз ам НКВД-дин Кьасумхуьруьн райотделдин оперуполномоченныйвиле тайинарзава. Гьа йикъалай башламишна, адан оперативно-чекиствилин кIвалахдин учет тухузва. 1940-йисан 15-мартдиз Сердер Гьамидов НКВД-дин Хив райотделдиз оперуполномоченныйвилиз рекье твазва. Амма, савадлу ва гележег авай къуллугъчи хьуниз килигна, 1941-йисан 1-январдиз адаз Махачкъаладиз - ДАССР-дин НКВД-дин центральный апаратдиз - 2-отделдин сад лагьай отделенидин оперуполномоченныйдин куьмекчивилин къуллугъдал теклифзава ва пуд вадралай (1941-йисан 1-апрелдиз) ам ДАССР-дин НКВД-дин силисдин частунин силисчивиле тайинарзава.
Ватандин ЧIехи дяве башламиш хьайила ва Дагъустандин территорияда бандитрин дестейри кьил хкажайла, дезертирар, жасусар, диверсантар, немсерин парашютистар пайда хьайи¬ла, государстводин хатасузвал хуьнин къуллугъдин лейтенант Докъузпара райондиз рекье твазва. Ина адакай сифтедай силисчи, ахпа НКВД-дин 1 райотделдин начальник жезва. 1942-1943-йисара ам НКВД-дин Табасаран райотделдин кьиле акъваззава. 1943-1945-йисара капитандикай НКВД-дин Хив райотделдин начальник жезва.
Дяведилай гуьгъуьниз - 1945-йисан октябрдиз - Сердер Гьамидов ДАССР-дин НКВД-дин бандитизмдихъ галаз женг чIугвадай отделдин начальникдин заместителвиле тайинарзава. И къуллугъдал алай вахгунда ада бандит¬рин дестеяр терг авун патал тади гьалда гел жагъурдай серенжемра активвилелди иштиракзава. «КIвалахдив гьа¬къисагъвилелди эгечIунай ва тахсиркаррин дестейрихъ галаз женгина активвилелди иштирак авунай» адаз чухсагъул малумарна. Гьа са вахтунда адаз «Женгинин агалкьунрай» медаль гузва.
1946-йисан 3-апрелдиз КПСС-дин Дагъустандин обкомдин бюродин къарардалди Сердер Жамиевич Гьамидов ДАССР-дин милициядин управленидин ОБХСС-дин начальниквиле тайи¬нарзава. И къуллугъдал ада 1951-йисан 21-майдалди кIвалахзава.
Гуьгъуьнин кьуд йисуз Гьамидов Сердеракай Кьасумхуьруьн районда милициядин начальник хьана.
1955-йисан 17-февралдиз ам, азарлу хьуниз килигна, майорвилин чинда аваз запасдиз акъудна. А вахтунда адан 49 йис тир. Идакай 19 йисуз ада НКВД- дин МВД-дин органра къуллугъ авуна. И са куьруь, гьа са вахтунда муракаб, четин ва дяведилай виликан ва гуъгъуьнин хаталу йисара Ватан патал гьакъисагъвилелди къуллугъ авуналди, ада Дагъустандин милициядин тарихда лишанлу гел, баркаллу тIвар туна.
Дидедиз хьана 27 йис тамам жезвай йикъан вилик - 1942-йисан 19-декабрдиз -С.Ж.Гьамидоваз Союздин НКВД-дин тапшуругъ агалкьунралди кьилиз акъудунай «СССР-дин НКВД-дин лайихлу работник» лагьай гьуьрметдин тIвар гана. Ам «Кавказ оборо¬на авунай», «Женгинин лайихлувилерай», «Германиядал гъалибвал къазанмишунай» медалрин, гьакI ведомстводин хейлин наградайрин сагьибни я.
1958-йисуз Сердер Жамиевич рагьметдиз фена. Амма адан тIвар РД-дин МВД-дин УБЭП-да, Дагъустандин ми¬лициядин тарихдин музейда, гьакI хайи Сулейман-Стальский РОВД-да рикIелай ракъурзавач.
Шак алач, диде-бубадиз, къуллугъдиз, ватандиз вафалу хцин тIвар гележегдин несилрин рикIерани эбеди яз амукьда.
Хазран Кьасумов.
