2005-йисалай къейд ийизвай Халкьдин садвилин югъ чи уьлкведин халкьарин гражданвилин рейсадвал ва ватанпересвал лишанламишзавай виридалайни жегьил суваррикай сад я. Алай йисан 4-ноябрдиз РФ-дин субъектра, гьабурукай яз Дагъустан Республикадин шегьерра ва районрани Халкьдин садвилин йикъан сувариз талукь мярекатар шад гьалара кьиле фена.
Кьасумхуьр. Пакаман кьиляй райондин центрадилай тир ва маса хуьрерай атанвай гзаф кьадар инсанар (абурун арада гъилера цуькверин кIунчIар авай школьникар гзаф авай) районда кардик квай Россиядин халкьарин адетдин культурадин Центр галайвал ахмиш жезва. Са акьван вахт фенач, адан вилик квай, чиле плитаяр тунвай, цуькверивни кул-кусрив безетмишнавай гьаят инсанрив ацIана. Музыкантри язавай, кьуд патаз чкIизвай авазри махлукьатдин гуьгьуьлар шадарзавай, шад мярекатдиз гьевеслувал гузвай.
Сятдин 10 тамам жедайла анал райондин администрациядин жавабдар къуллагъчияр, управленийринни отделрин начальникар, районда кардик квай къуллугърин руководителар атана, абур милли парталар алай рушари цуькверин кIунчIар вугуналди къаршиламишна.
Халкьдин садвилин йикъан суварин мярекат кьиле тухузвайди тир бажарагълу культуработник, машгьур тамада Ярагьмед Ярагьмедова сифте гаф муниципальный райондин администрациядин Кьилин 1-заместитель Лацис Абидинович Оруджеваз гана. Ада Халкьдин садвилин сувар мярекатдин иштиракчийриз, вири районэгьлийриз муниципальный райондин Кьил Нариман Шамсудинович Абдулмуталибован, депутатрин Собранидин, райадминистрациядин тIваруни-хъай мубаракна, суварин тарихдикай лагьана.
- Гьуьрметлу районэгьлияр, суварин мярекатдин иштиракчияр! – лагьана Л. А. Оруджева. – 2005-йисалай къейдзавай Халкьдин садвилин сувари гзаф миллетар яшамиш жезвай Россиядин Федерациядин халкьарин дуствални меслятвал, санал хьун лишанламишзава. И суварихъ тарихдин дерин дувулар ава. Чи халкьарин арада авай дуствили Дагъустанни хуьзва, стхавиле, садвиле чи къуват, руьгь ава, Россиядин халкьарихъ галаз чи дуствал пакди я. Гьавиляй чи садвал, дуствал гележегдин абадвилин, мублагьвилин, бахтлувилин заминни я. Гьа са вахтунда садвал, тупламишвал, къуншивилин алакъаяр Россиядин государстводин бинярни я. Халкьдин садвал, абурун стхавал себеб яз, чи уьлкве, республика ва районни вилик физва. Инанмиш я, гъалибвилер, агалкьунар мадни жеда!
Рахунрилай гуьгъуьниз Дагъустан Республикадин лайихлу артист Омар Меликова «Хва я зун» мани лугьуналди, суварин концертдин чIехи программа башламишна.
Гьевескарар тир Азим Ризаева, Тофик Мегьамедова, Мерзият Амахановади, Агъарагьим Агъарагьимова, фольклордин «Кюре» ансамблди лагьай манияр, райондин Аялрин яратмишунрин кIвалин рушарин дестеди авур кьуьлер, музыкальный школадин муаллим Максим Мирзоева тардал тамамарай лезги авазар суварин иштиракчийри гурлу капар ягъуналди къаршиламишна.
Районда кардик квай Россиядин халкьарин адетдин культурадин Центрадин вилик кьиле фейи шадвилин мярекатдилай гуьгъуьниз Кьасумхуьруьн 1-нумрадин ДЮСШ-дин спортдин залда Халкьдин садвилин йикъаз талукьарна азаддаказ къуршахар кьунай школьникрин арада акъажунар кьиле фена. Ана хуьрерай атанвай 60-далай виниз жаван спортсменри иштиракна. Къизгъиндаказ кьиле фейи акъажунра 1, 2 ва 3-чкаяр кьур спортсменриз Гьуьрметдин грамотаяр, пулдин призар ва къиметлу пишкешар гана.
Эхь, чун Халкьдин садвилелди къудратлу я.
Текст кхьейди ва шикилар ягъайди Хазран Кьасумов я.
