13-октябрдиз Алкьвадрин хуьруьн юкьван школадин дидед чIаланни литературадин кабинетдин классда «Лезги чIал ва адетар хуьн» лишандик кваз мярекат кьиле фена. Ам и мектебда лезги чIалан тарсар гузвай муаллимрин куьмекдалди тешкилнавайди тир.
И мярекат, лезги чIалан метлеблувиликай ва кесерлуваликай куьрелди лугьуналди, дидед чIалан тарсар гузвай муаллим Агьмедова Малвинади ачухна ва межлис тухун ученицаяр тир Сабрина ва Саният Гьамзатоврал тапшурмишна.
Классдин са пипIе милли парталар алай аялри сариз кек язавай ва ракъинал сар эвязавай. Анал гьакI чIахар регъведай регъвер, мехкIуьт гьазурдай алатар ва маса шейэрни алай.
Хайи чIалан важиблувиликай, бязи мисаларни гъиз, сифте анал школадин директор Гьамид Рашидович рахана.
Гуьгъуьнлай анал гаф рахай и хуьруьн библиотекадин заведующий Сефикъулиева Гуьлпичеди хуьруьн тарихдикай, тухумрикай, чи адетрикай, виликдай пIинид багълара тухудай «КIару» суварикай маракьлу суьгьбет авуна.
Школада кIелдай ва кIвалахдай йисарикай вичин рикIел хкунар, насигьатдин гафар гзаф анал гьукуматрин са жерге наградайрин сагьиб, зегьметдин ветеран Алиярова Мислимат рахана.
Нубатдин гафар и мярекатдиз теклифнавай шаирар тир Сажидин Саидгьасановаз ва и цIарарин автордиз гана. Дидед чIал, чи милли адетар хуьнин ва абур багьа ядигарар яз хуьнин важиблувиликай, мумкинвилерикай лугьунихъ галаз санал абуру анал чпин са шумуд шиирни кIелна, чпин и мукьвара чапдай акъуднавай ктабар школадин библиотекадиз пишкешна.
Эхирдай аялри вечердин кьилин темадиз талукьарна викторинадин суалриз, мискIалриз тамам жавабар вахкана.
Гьар рахунрин арайра аялри хайи дидед чIалаз талукьарнавай шиирар хуралай кIелна, манияр лагьана.
Санлай къачурла и мярекат метлеблуди ва маракьлуди хьана.
А. Камилов.
