Са тIимил вахт вилик Пятигорск шегьерда Кефератан Кавказдин Федеральный округда Россиядин Федерациядин Президентдин патай тамам ихтиярар ганвай векил Сергей Алимович Меликов округдин регионрин агъсакъалрин Советдин членрихъ галаз гуьруьшмиш хьанай, анал кIвалахдин пландиз килигнай ва абурун кIвалахдин рекьяй теклифар кьабулнай. Федеральный округдин регионрин агъсакъалрин Советра заседанияр кьиле физва, анрал С. А. Меликован теклифар гьялзава.
Гьа ихьтин гегьенш заседание «Сулейман-Стальский район» муниципальный райондин Кьилин патав гвай агъсакъалрин Советдани кьиле фена. Адан кIвалахда муниципальный райондин Кьил Нариман Шамсудинович Абдулмуталибова, Дагъустан Республикадин Кьилин патав гвай агъсакъалрин Советдин член Назим Играмудинович Ханбалаева, администрациядин управленийринни отделрин начальникри, райондин общественный тешкилатрин ва организацийрин руководителри, хуьрерин поселенийрин кьилери, СМИ-дин такьатрин векилри, теклифнавай маса юлдашри иштиракна.
Гегьенш заседание и мярекат тухунин макьсаддикай ва адан важиблувиликай лугьуналди ва Назим Играмудинович тебрик авуналди, муниципальный райондин Кьил Нариман Шамсудинович Абдулмуталибова ачухна ва кьилени тухвана.
Сифте гаф ДР-дин Кьилин патав гвай агъсакъалрин Советдин член Назим Играмудинович Ханбалаев рахана. Ада Пятигорск шегьерда Сергей Алимович Меликова тухвай гуьруьшдикай ва анал Дагъустан Республикадин шегьеррин ва районрин агъсакъалрин Советриз гайи тапшуругърикай, Советрин кIвалахдин планрикай гегьеншдиз суьгьбетна. Малум хьайивал, Советрин кIвалахдин планда ва С. А. Меликован теклифра экстремизмдин вилик пад кьунихъ, кIвалахдай цIийи чкаяр тешкилунихъ, гъвечIи ва юкьван карчивал вилик тухунихъ, экономический рекьяй вилик фидай рекьер жагъурунихъ, промышленность, хуьруьн майишат, туризм, еридин образование, здравоохранение кIвачел ахкьалдарунихъ рекье тунвай кIвалахди еке чка кьазва.
- Жегьилрихъ галаз кIвалах тухунин, халкьарин арада вири вахтара дуствал мягькемарунин карда кьилин роль къугъвай дагъвийрин адетар кIвачел ахкьалдарунин кIвалахни йигинарун лазим я, - давамарна Н. И. Ханбалаева. – Агъсакъалрин Совет – им гражданский обществодин асул звенойрикай сад я, Советдин членар уьмуьрда кьиле физвай вири вакъиайрин иштиракчияр хьун, кIвалах активдаказ тухуниз гьамиша гьазурбур яз хьун лазим я.
Райондин агъсакъалрин Советдин председатель Фахрудин Османов вичин рахунра Советди тухузвай кIвалахдал гегьеншдиз акъвазна. Кьилди къачуртIа, ада къейд авурвал, Сергей Алимович Меликовалай чар райондин Советдизни хтана, ана къарагъарнавай месэлайриз райондин ва хуьрерин Советрин заседанийрал килигна, и кар давамни жезва.
Агъсакъалрин Советдин гегьенш заседанидал райондин администрациядин Кьилин заместитель Саид Темирханова эхиримжи вахтара районда социально-экономический рекьерай тухузвай кIвалахрикай, хатасузвал хуьнин рекьяй администрациядин Кьилин заместитель Гьажиагьмед Гьажиагьмедова районда авай общестенно-политический гьаларикай, райондин образованидин управленидин начальник Индира Османовади районда образованидин хиле хьанвай хъсан нетижайрикай, хуьруьн майишатдин отделдин начальник Мегьамедзагьид Бабаева районда хуьруьн майишат вилик физвайдакай, инвестиционный проектар кардик кутазвайдакай, ЦIийи Макьарин ва Кьулан СтIалрин хуьрерин агъсакъалрин Советрин председателар тир Рамазан Эмиргьамзаева ва Абдул Межидова жегьилрин арада тербиядин, терроризмдин вилик пад кьунин рекьерай агъсакъалри тухузвай кIвалахрикай гегьешдиз суьгьбетна. Гьа са вахтунда абуру районда общественно-политический гьалар хъсанарунин, экстремизмдинни терроризмдин вилик пад кьунин, акьалтзавай несил ватанпересвилин руьгьдаллаз тербияламишунин ва маса рекьерай теклифарни гъана.
Заседанидин нетижаяр кьун яз, эхирдай Нариман Шамсудинович Абдулмуталибов рахана.
- Къе чун инал Кеферпатан Кавказдин Федеральный округда РФ-дин Президентдин патай тамам ихтиярар ганвай векил, чи баркаллу ватанэгьли Сергей Алимович Меликова агъсакъалрин Советриз ганвай теклифрин месэладиз килизава, - лагьана Н. Ш. Абдулмуталибова. – И месэладай за заседанидал рахай юлдашрин рахунрихъни дикъетдивди яб акална, абуру къарагъарай гзаф месэлайрихъ галаз зун разини я. За фикирзавайвал, 1990-йисара чи уьлкведа тербиядин месэлайриз фикир гуз амукьнач. Ида чIуру кIвалахрал, татугайвилерал гъана. Гьич тахьайтIа, чи къудратлу уьлкве – Советрин Союз чкIана. Идакди заводри, гьабурукай яз чи районда авайбуруни, кIвалах хъувунач. Са мисал гъин: районда «Рычал-су» заводди кIвалахзава. Лугьуз жеда хьи, ада Цмуррин хуьр хвена. «Мевер» завод кардик акатунини гзафбуруз кIвалах гана. Ида къалурзава хьи, уьлкведа, республикада ва райондани гьалар къайдадик акат хъийизва. Амма са бязи крари чак секинсузвал кутазва. Мисал яз, районда пуд сеферда КТО малумарна. Ада районда аваданвилин, экономикадин ва маса рекьерай жезвай хъсан крар, агалкьунар «сериндик» кутазва. Агалкьунар, тарифдай крар чахъ тIимил авач. Чна гьукуматдин къурулуш хуьн лазим я. Закондин, гьукуматдин къанунриз акси жедай ихтияр садазни авайди туш, я и кардиз рехъни гудайди туш. За квез ачухдиз лугьун: чи районэгьлияр законриз яб гудай, чпихъ ахлакь, низам авайбур я. Къанунрал амал авун чаз тарихдай, чи ата-бубайрилай атанвайди я. Инанмиш я, и кар чна къенлай кьулухъни давамда.
Инал Назим Играмудиновича дуьз лагьана: чи куьчеяр, рекьер, паркарин къерехар зирзибилди кьунва. За алава хъийида: чавай мал-къарадин иесивални ийиз жезвач. И чIуру кIвалахар чна, районэгьлийри, арадай акъудун лазим я, паталай атана и крар масада ийидач. И рекьерай агъсакъалрин чкайрал алай Советри, общественный тешкилатри, самоуправленидин органри чпин кIвалах гужлу авуна кIанда.
- Агъсакъалрин Советдин членрин гафунин къуват екеди я, - лагьана вичин рахунрин эхирдай Н. Ш. Абдулмуталибова. – Умудлу я, абуру чпин камаллу гафуналди, райондин общественный уьмуьрда активвилелди иштиракуналди, районда общественно-политический гьалар хъсанаруниз, социально-экономический рекьерай вилик финиз, амай кимивилер арадай акъудуниз куьмекда.
Заседанидал и месэла хуьрерин поселенийрин агъсакъалрин Советрал гьялунин къарарни кьабулна.
Текст кхьейди ва шикилар ягъайди Хазран Кьасумов я.
