Лидия Стальская
Зи имидин чуьнгуьр
Эцигзава, кичIез-регъуьз,
За гъил куьгьне чуьнгуьрдал.
ГьикI ава заз ам инсан хьиз,
Рази тахьай уьмуьрдал.
Килигайла зун чуьнгуьрдай
Атанвай кьван ферериз,
Акъатзава цIай зи чандай,
Кьел ягъайд хьиз хирериз.
Им чуьнгуьр я зи имидин,
Телеф хьанвай дяведа.
Вилив хуьз рехъ иесидин,
Лугьузвай ам хкведа.
Къвез хъфена, йисар шумуд,
Зи ими мад хтанач.
Кесиб чуьнгуьр атIай умуд,
Лал хьана мад раханач.
Гъил алтадиз, гъил алтадиз,
Акъуддайд хьиз биришар,
Зун алахъда дуьздал хъийиз
И чуьнгуьрдин нехишар.
Гуьзел Межидова
Хуш туш заз
Зи уьмуьр са ичин багъ я
Ана чIуру тар хуш туш заз
Фитнедихъай зун яргъа я.
КIвалер чIурдай кар хуш туш заз.
Гьалт тавурай пис кас рекье,
Вуч аватIа чирдай рикIе.
Какадариз къалин сирке,
Гваз къекъведай кас хуш туш заз.
Дуьнья, за вун гьикьван гатан
Гьахъвал, гьахъвал, лугьуз -
рахан.
КIандач заз гьич са кар тапан
Гьич чIуру ният хуш туш заз.
Итимни паб какадариз,
Фитне кIула акьадариз.
Кьилелай кап аладариз,
Кьве мез авай кас хуш туш заз.
Гьахъвилин чин лацу агъ я.
Дуьзвилин рикI цуьквед багъ я.
Мердвилин син кьакьан дагъ я.
Туькьуьлвилин дад хуш туш заз.
Аният Исрафилова
Сийидар
Югъ-къандавай дегиш жезва,
Сийидхуьруьн шикил, къамат,
Накь акурвал, къе амукьдач
Акур насдиз жез аламат.
Хкаж жезва дараматар
Сад - садалай артух, туькIвей,
Гьар куьчеда шумуд машин,
Гьар варцелни, лампа
куькIвей.
Гьар кIвалерихъ, багъни гала
Гьар кIвалера, булах ава.
Газни гъанва, рехъни цанва
Женнетдиз ухшар, Сийидар.
Къуй хуьруьнбур квез гьамиша,
Сагъвал, шадвал, гьуьрмет
хьурай.
Къуй гьамиша куь кIвалера
Берекатни, девлет хьурай.
