Сулейман-Стальский район неинки камалэгьлийринни шаиррин, гьакIни ватанперес, зегьметкеш, ажайиб кьисметрин инсанрин маканни я. Райондай гзаф инсанар кьисметди патарал акъудна, анра абуру лезгидиз хас къилихар, инсанвилин ерияр хвена, чпин къанажагълувилелди, гьакъисагъ зегьметдалди гьуьрмет, кIанивал къазанмишна.
Мукьвал йикъара муниципальный райондин Кьил Нариман Шамсудинович Абдулмуталибованни Бакуда яшамиш жезвай кьегьал лезги хва, агъсакъал Абудин Мегьамедович Рамазанован арада хуш рафтарвилин гуьруьш кьиле фена. Гуьруьшдилай гуьгъуьниз зун багърийрал кьил чIугваз Кьасумхуьрел хтанвай А. Рамазановахъ галаз гуьруьшмиш хьана.
- Зун, хтул, 1936-йисуз 35 кIвал авай Кьасумхуьруьн райондин Бигеррин хуьре дидедиз хьана, - башламишна ихтилат Абудин Мегьамедовича. – Чун хзанда вад аял авай – зунни кьуд вах. 1941-йисуз зи дах Мегьамед фронтдиз тухвана, Моздокдин патав кьиле фейи са женгина ам телеф хьана, гьана стхавилин сурара кучуднава. Диде Ракъията Бигерринни Кьианрин сад авунвай «ЦIийи рехъ» колхозда кIвалахзавай. Чахъ 2 кал, 3 лапагни авай, ятIани дарвал, каш такуна амукьнач. Лугьуз жеда хьи, заз аялвал акурди туш. Гьа икI, дарвал себеб яз, дидедин меслятдалди, 15 йиса авай гада яз зун Бакудиз финиз мажбур хьана.
А. Рамазанов Бакуда ремесленный училищедик экечIна. Анаг куьтягьай жегьилди «Молотовнефть» трестда нафтIадин мяденра кIвалахиз эгечIна. И везифаяр намуслувилелди кьилиз акъудунихъ галаз санал, ам тренер Армен Багдасарянан гъилик боксдални машгъул хьана, хейлин турнирра кIвенкIвечи чкаяр кьуна. Армиядин жергейра къуллугъдайла А. Рамазанова Балтийский флотдин кIвенкIвечивал патал тухвай акъажунра приздин 3-чка кьуна. Им чIехи агалкьун тир.
1958-йисуз армиядай хтай Абудин Рамазанова Бакудин «Карадагнефть» НПУ-да буругъар эгъуьндай оператор яз кIвалахун давамарна.
1965-йисуз кьегьал лезги хци, кIвалахни ийиз, Азербайжан ССР-дин кьилин ва юкьван пешекарвилин образованидин министерстводин Бакудин йифен нефтяной техникумни кIелна акьалтIарна. Ам контрольно-измерительный приборрин рекьяй участокдин инженервиле тайинарна, гьа са вахтунда, управленидин руководстводи гьар са кIвалахдин гъавурда авай пешекар тир лезги хцин хиве эксплуатационный цехдин начальникдин везифаярни туна. Гьа вахтунда А. Рамазанован гъилик 56 касди кIвалахзавай.
- Абудин Мегьамедович, ви документриз килигдайла, за ихьтин са кардиз фикир гана: вахъ «стахановец» тIвар ганвайвилин удостоверение ава. И тIвар гьикI ва низ гузвайди я? – хабар кьуна за А. Рамазановавай.
- Гьа тIвар, дуст кас, кIвалахда еке агалкьунар хьунай гузвайди я, - лагьана ада. – Вуна фикирмир хьи, за жувалай тарифзава лагьана, за ви суалдиз жаваб я гузвайди. Са юкъуз чIехи тIурфан, гар акъатна, сел хьиз марф къвана. Замыкание хьуникди нафтIадин мяденар электричестводалди таъминарзавай трансформаторар, 36 двигатель кана, хейлин столбаяр ярх, абурай тухванвай симер кьатI хьана. Нетижада саки 300 буругъда кIвалах акъваз хьана. Управленидин руководстводи тIебиатдин завалдин чIуру нетижаяр арадай акъудун зун кьиле авай электрикрин махсус бригададин хиве туна ва чаз са гьафте вахт гана. Чна лагьайтIа, са суткадин къене вири кIвалахар куьтягьна, идай заз «стахановец» лагьай тIвар, бригададин амай членриз хъсан премияр гана. За кIвалахзавай участокдиз гьахьзавай хивел «Ина «стахановец» Абудин Рамазанова кIвалахзава» гафар кхьенвай кьулни алкIурнай.
Лагьана кIанда, Абудин Мегьамедович нафтIадин мяденрин кIвалахрихъ галаз алакъалу 11 пешедин сагьиб я. Гьавиляй ада са шумуд йисуз илимдинни ахтармишунардайбурун дестедик квазни кIвалахна, рационализаторвилин са шумуд теклиф гана, абурукай къенин йикъарани менфят къачузва.
1993-йисалай 2009-йисалди А. М. Рамазанова «Азнефть» государстводин нефтяной компанидин нафтни газ хкудзавай «Булла-море» управленида (гьуьлел алай буругъра) механик, электромонтер яз кIвалахна.
Санлай къачурла, Абудин Мегьамедовича къе вичикай къецепатан уьлкве хьанвай Азербайжан Республикада 60 йисуз нафтIадин мяденра гьакъисагъвилелди зегьмет чIугуна. Адан шикил хейлин йисара Бакудин Къарадагъ райондин ва Управленидин Гьуьрметдин доскайра хьана.
А. Рамазанов Къарадагъ райондин гьуьрметлу агьали, райондин агъсакъалрин Союздин председателни я.
- Зун алай вахтунда Бакудин Лок-Патан поселокда яшамиш жезва, - лугьузва агъсакъалди. – Захъ 4 кIвалин секция, 4 велед ва 7 хтулни ава, зун зи кьисметдилай, яшайишдилай гзаф рази я.
- Абудин Мегьамедович, вун хайи ватандиз мукьвал-мукьвал хуьквезвани ва ваз чи район гьикI акуна? – хабар кьун тавуна акъвазиз хьанач завай.
- Виликдай, яни чи уьлквеяр сад тирла, зун хайи ерийрал кьил чIугваз мукьвал-мукьвал хуькведай, гила чара уьлквеяр хьайила, жувни са яшариз акъатайла, са акьван фад-фад хуьквез жезвач, ятIани, заз зи хайи ватан гзаф кIан я, гьавиляй за Кьасумхуьрелай са куьгьне кIвалерни маса къачунва, абур ремонт хъийизва. Килигин, кьисметар я, я зун хуьквен, я веледар. Районда хьанвай дегишвилерикай рахайтIа, абуру зун кьадар авачир кьван шадарна. Завай хуьквез тахьай са 7-8 йисан къене Кьасумхуьруькай халис шегьер хьанва. И йикъара Нариман Шамсудинович Абдулмуталибовахъ галаз гуьруьшмиш хьайила, за адаз социально-экономический рекьерай районда тухванвай кIвалахрай чухсагъул лагьана. Хайи райондихъ, адан руководстводихъ мадни еке агалкьунар, хъсанилер хьун зи мурад я.
… Азербайжан Республикадин лайихлу нефтяник, «Зегьметдин ветеран» медалдин ва маса наградайрин сагьиб тир Абудин Мегьамедович Рамазановакай и макъала кхьидайла, вучиз ятIани, за камаллу и кас дагъдин вацIув гекъигна. Зун гьахъни я, вучиз лагьайтIа, дагъдин гурлу вацIариз, чпин рекье кьакьан дагълар, рагар, манийвилер гьалтзаватIани, акъвазун хас туш, абуру анжах виликди еримишда. Чи гьуьрметлу агъсакъални гьакI я – ада вичин уьмуьрдин баркаллу рехъ давамарзава.
