2002-йисуз Курхуьруьн сад лагьай нумрадин юкьван мектебдиз педагогвилин зегьметдин ветеран, вичи гзаф йисара гьа и мектебда математикадин тарсар гайи Рагьимов Мирзекериман тIвар ганай. И югъни хуьре еке шад сувариз элкъвенай.
Гьа чIавалай гилалди мектебдал рагьметлудан рухваяр тир Шакиран, Разинан, Фазилан, Русланан гъил ала. Аниз чпивай жезвай вири жуьредин куьмекар гузва, иллаки ремонтар кьиле фидайла, суварар ва маса мярекатар кьиле тухудайла.
Са шумуд йисуз абуру ДГУ-дин филологиядин чIалан факультетда лап хъсандиз кIелзавай студентриз чпин патай стипендиярни гуз хьана.
Мектеб цIийи кIелунин йисаз гьазурунин кардани Рагьимоври баркаллу мад са кIвалах авуна: чпин хсуси такьатрин гьисабдай мектебдин дараматдин мярекатар тухузвай вилик пад штукатурка авуна ва герек чкайриз ширерни яна, гуьрчегарнава.
УстIарар тир Д. Пирмегьамедова, Къ. Гьуьсейханова, Д. Къазиметова (шикилда) и кIвалахар хъсан еридивди тамамарна акьалтIарнава.
Ихьтин мергьеметлувилин хъсан кардай Мирзекерим Рагьимован рухвайриз мектебдин коллективди, хуьруьн поселенидин администрацияди, хуьруьнбуруни чахсагъул, сагърай лугьузва.
Умудзава, ихьтин кьегьал рухвайрилай чешне къачуналди, хуьр аваданламишун, алай йисуз чна вичин 675 йисан юбилей къейдзавай лезги халкьдин къагьриман хва, ч1ехи шаир ва мазан Куьре Меликаз хуьруьн юкьвал лайихлу гуьмбет хкажун патал мергьеметлувилин куьмекар гудай баркаллу рухваяр майдандиз мадни акъатда.
Райсудин Набиев.
