«Сулейман-Стальский район» муниципальный райондин экономикада уьзуьмчивили кьилин чка кьазва. «2013-2020-йисара районда уьзуьмчивал вилик тухун» программа кьабулуни ва кардик акатуни эхиримжи вахтара и хиле хъсан нетижаяр арадал гъизва. Алатай йисуз районда 6600 тонндив агакьна ципицIар кIватI хъувуни и кардин гьакъиндай ачухдиз шагьидвал ийизва.
- Алай йисуз райондин хуьруьн майишатдин карханайри, КФХ-ри ва арендаторри ципицIрин тарифдин бегьер битмишарнава, - лугьузва райондин хуьруьн майишатдин отделдин начальник Мегьамедзагьид Бабаева. – Гьавиляй цIи районда 7000 тонндилай виниз ципицIар кIватI хъувун гуьзлемишзава. Алай вахтунда вири къуватар ракъинин кагьрабайрин бегьер кIватI хъувунал желбнава.
Районда гзаф майданра уьзуьмлухар авай карханайрик «Зардиян», «Гюлгери вацI», «Дере», «Кварчаг» ООО-яр, «Заря» СПК, «Садыков» ва «Мухаммад» КФХ-яр акатзава.
Лагьана кIанда, Эминхуьре, КIварчагъа, ЦIийи Макьарал, ДаркIуш къазмайрал арендадин къайдада уьзуьмчивилел машгъул жезвай кьилдин ксарин кьадарни гзаф я.
И йикъара чун Эминхуьре арендаторрин са шумуд участокдиз фена, анра ципицIар кIватI хъувунин кIвалахар кьиле физвай гьаларихъ галаз таниш хьана.
Райондин Собранидин депутат, тежрибалу уьзуьмчи Миламудин Мегьамедован кIвачихъ бегьердал атанвай 8 гектар уьзуьмлухар гала. Арендаторди анрай фад дигмиш жедай сортарин 20 тонн ципицIар атIана, муьштерийриз чкадал маса гана.
- За гьар йисуз уьзуьмлухрин гьар са гектардай 70 центнердилай тIимил тушиз ципицIар кIватI хъийизвайди я, - лугьузва М. Мегьамедова. – ЦIи за гьар са гектардай 100 центнердилай тIимил тушиз, санлай 80 тонн ципицIар кIватI хъийида.
Чаз акурвал, Самур Гьамзатован, Надир Ягьяеван, Эльмира Агъамирзоевадин, Нумрудин Ферзилаеван, Гьажимет Алагьвердиеван арендадин участокрани ципицIрин тарифдин бегьер ава, анра ципицIар кIватI хъувунин кIвалахар хъсан тешкиллувал аваз кьиле физва.
Анрани гьар са гектардай 80-90 центенр ципицIар кIватI хъувун тешкилзава. Им вилик йисара кIватI хъувурдалай хейлин гзаф я.
Арендаторри, абуруз ципицIар атIунин карда куьмекар гузвай рабочияр тир Зайнаб Абдуллаевади, Эльмира Агъамирзоевади, Саният Къурбановади, Насият Рамазановади, Нарима Тагьировади, Зарема Меликовади, Афисат Рамазановади ва масабуру гьар юкъуз 400-500 килограмм ципицIар атIузва.
Хазран Кьасумов.
Шикилда: арендатор М. Мегьамедова ципицIар атIузва.
