1-сентябрь. Россиядин Игит Радим Халикьован тIварунихъ галай Кьулан СтIалрин юкьван школадин пайдахралди, плакатралди хъсандиз безетмишнавай гьаят школьный формаяр алай, гъилера цуьквер авай, чинрал хъвер алай аялрив, абурун диде-бубайрив, мауллимрив ва мугьманрив ацIанва. Сятдин 9 тамам жедайла «Сулейман-Стальский район» муниципальный райондин Кьил Нариман Шамсудинович Абдулмуталибов, ДР-дин Халкьдин Собранидин депутат, академик Гьамидуллагь Исмаилович Мегьамедов, Дагъустан Республикадин печатдин ва информациядин министрдин 1-заместитель Зубайру Исаевич Зубайруев, райондин администрациядин Кьилин 1-заместитель Лацис Абидинович Оруджев, райондин образованидин управленидин начальник Индира Гьажибалаевна Османова цуькверин кIунчIар вугунивди шадвилелди кьабулна.
Сятдин 9 тамам хьайила школада 2015-2016-цIийи кIелунин йис башламиш хьуниз талукьарнавай шадвилин митинг ачухна. Ам школадин 11-классда кIелзавай Альбина Абдулаевади ва Агьмед Тагьирова устадвилелди кьиле тухвана.
РФ-дин Гимн ягъайдалай гуьгъуьниз сифте гаф Нариман Шамсудинович Абдулмуталибов рахана.
- Гьуьрметлу школьникар, диде-бубаяр ва мугьманар! – лагьана Н. Ш. Абдулмуталибова. – За квез къенин югъ – Чирвилерин сувар райондин Собранидин, администрациядин ва кьилди жуван патай мубаракзава. Школадиз цIи сифте яз къвезвай бицIекриз за кьилди алхишдин келимаяр лугьузва. Санлай къачурла, алай йисуз районда сифте яз партайрихъ 650 аял ацукьда, ихьтин аялар Кьулан СтIалрин школада 36 ава. Заз абуру чирвилерин алемдиз сифте вегьезвай кам бахтлуди хьана кIанзава. Хуьруьн школа чи кьегьал хва, Россиядин Игит Радим Халикьован тIварунихъ гала. Умудлу я, школадиз къе кам вегьенвай, гьакIни ана кIелзавай амай аялри хуьряй акъатай кьегьал рухвайрин баркаллу крар, хъсан адетар давамарда. Зи мурад дуьнья ислягь, уьлкве, республика ва район абад хьана, цIийи кIелунин йисуз муаллимрихъ кIвалахда, аялрихъ кIелуна агалкьунар хьун я. Сувар мубаракрай, играмибур!
Школадин директор Ифриз Бабаевади школа цIийи кIелунин йисаз хъсандиз гьазур хьанвайдакай, и кардик хуьруьнвийри, аялрин диде-бубайри еке пай кутурдакай суьгьбетна, и кардай абуруз чухсагъул малумарна.
- Гьуьрметлу районэгьлияр, кьуланстIалвияр! – лагьана Зубайру Зубайруева – Камалэгьлийринни арифдаррин макан тир райондиз, Россиядин Игит Радим Халикьован тIварунихъ галай школадиз атунал, гуьзел къенин мярекатда иштиракунал зун гзаф шад я. Аялрин сиверал алай хъвер, ихьтин гуьзел ерияр акурла заз мадни шад хьана. За квез ачухдиз лугьун, эхиримжи вахтара районда социальный ва экономикадин рекьерай тухузвай хъсан кIвалахдилай, къазанмишзавай агалкьунрилай республикадин руководство рази я. Образованидин хилени аквадай хьтин хъсан нетижаяр жезва. Тебрикдин келимаяр лугьуналди, заз цIийи кIелунин йисуз райондихъ, кьилди къачуртIа, Россиядин Игит Радим Халикьован тIварунихъ галай школадин коллективдихъ мадни чIехи агалкьунар хьана кIанзава.
Шадвилин мярекатдал тебрикдин келимаяр гваз райондин администрациядин Кьилин 1-заместитель Лацис Абидинович Оруджев, Кьулан СтIалрин хуьруьн поселенидин кьил Муслим Альдеров, диде-бубайрин патай зегьметдин ветеран Ражаб Исмаилов ва маса юлдашар рахана.
Гьар са касдин рахунрилай гуьгъуьниз школада кардик квай фольклордин ансамблдин иштиракчийри, школьникри кьуьлер авуна, манияр лагьана, 1-классдиз атанвай аялри школадикай, муаллимрикай шиирар хуралай кIелна.
Муниципальный райондин Кьил Нариман Шамсудинович Абдулмуталибова шадвилин мярекатдал яргъал йисара школада муаллимвиле ва директорвиле кIвалах авур Анвар Абдусемедовав райондин администрациядин Гьуьрметдин грамота вахкана.
1-классдин ученица Саида Гуьлмегьамедовади ва 11-классдин ученица Музлифат Абакаровади сифте зенг яна, школада цIийи кIелунин йис башламиш хьана.
Нариман Шамсудинович Абдулмуталибов, Зубайру Исаевич Зубайруев, Гьамидуллагь Исмаилович Мегьамедов ва жавабдар маса работникар школадин муаллимрихъ галаз гуьруьшмиш хьана, абурун дерди-гьал чирна, школадин 11-классда тухвай «Аялар террордиз акси я» ачух тарсуна иштиракна.
Муниципальный райондин руководство ва Махачкъаладай атанвай багьа мугьманар АгъастIалрин къазмайрал цIийиз ачухнавай «Чубарук» тIвар алай аялрин бахчадани хьана. И кардихъ вичин сесбебни авай: 1-сентябрдиз ина 120 аял кьабулна, аялрин бахчади кIвалах ийиз башламишна.
Аялрин бахчадин заведующий Рена Рагьмановади, тербиячийри райондин гьакимар ва Махачкъаладай атанвай мугьманар хушвилелди кьабулна. Абур кьве мертебадин, алай аямдин истемишунриз жаваб гудайвал эцигнавай ва хъсандиз тадаракламишнавай дараматдин къенез гьахьна, группайра, аялриз тIуьн гузвай, абур къугъвазвай ва ксузвай кIвалериз, кухнядиз тамашна, рази яз амукьна.
Нариман Шамсудинович Абдулмуталибова республикадин меркездай атанвай мугьманрихъ элкъвена лагьайвал, «Чубарук» аялрин бахча эхиримжи 25-30 йисан къене районда эцигнавай са дарамат я. Ана саки 30 касдиз кIвалахдай чкаяр ава.
- Кьулан СтIалрин юкьван школада сифтегьан зенг ягъуниз талукьарна тухвай мярекатди хьиз, заз «Чубарук» аялрин бахчадини екез таъсир авуна, - лагьана ДР-дин печатдин ва информациядин министрдин 1-заместитель Зубайру Исаевич Зубайруева. – Кьиблепатан Дагъустанда 60-70 чкадин аялрин бахчаяр эхиримжи вахтара са шумуд эцигна, 120 чкадин бахча – им сад я. Завай инанмишвилелди лугьуз жеда хьи, гуьрчегвилин, тадаракралди таъминвилин жигьетдайни «Чубарук» аялрин бахчадив къведайди мад авач, ам сад лагьайди я.
Эхирдай къейд ийиз кIанзава хьи, Кьулан СтIалрин хуьре хьиз, Кьасумхуьруьн, ЦIийи хуьруьн, Курхуьруьн, Герейханован, Агъа СтIалрин, ЦIийи Макьарин, Сардархуьруьн, КIварчагърин, ДаркIуш къазмайрин, Сийидрин, Вини СтIалрин ва маса хуьрерин юкьван школайрани 2015-2016-цIийи кIелунин йис башламишуниз талукьарнавай шадвилин мярекатар махлукьатдин активвал ва тешкиллувал аваз кьиле фена. Анра райондин администрациядин жавабдар работникри ва и къуллугърин руководителри иштиракна.
Хазран Кьасумов.
Шикилра: Н. Ш. Абдулмуталибова тебрикдин гаф рахазва; сифтегьан зенг язава; райондин гьакимар ва мугьманар «Чубарук» аялрин бахчада.
Шикилар автординбур я.
