Дербент шегьерда кардик квай «Чемпион» спортдин клубда вердишвилер къачузвай гадайри спортдин женгерин жуьрейрай Вирироссиядин, международный чIехи дережайрин турнирра, Россиядин, Европадин ва дуьньядин чемпионатра агалкьунар къазанмишиз са шумуд йис я. Идалди абуру Россияда виридалайни къадим шегьер тир Дербентдин, гьакIни Дагъларин уьлкведин тIвар яргъарани машгьурзава.
ИкI, 2015-йисан майдин вацра Италиядин Тоскано шегьерда 110 уьлкведай атанвай спортсменрин иштираквал аваз женгерин жуьрейрай дуьньядин чемпионат кьиле фена. Ана ММА-дай ва женгинин самбодай «Чемпион» клубдай тир Осман Гьажимусаева 65 килограммдин заланвиляй инанмишвилелди 1-чкаяр кьуна.
И йикъара чун Осман Гьажимусаевахъ галаз гуьруьшмиш хьана, чи арада адан спортдин рекьикай, къазанмишнавай агалкьунрикай ихтилат кьиле фена.
Малум хьайивал, О. Гьажимусаев 1994-йисуз Кьасумхуьрел дидедиз хьана. Школада кIелдай йисара ам тренер Хасмет Къазиханован гъилик самбодал машгъул хьана, районда ва Кьиблепатан Дагъустанда тухвай акъажунра са шумудра кIвенкIвечи чкаяр кьуна.
Школа акьалтIарай О. Гьажимусаев Дербентда политехнический колледждик экечIна ва анаг хъсан къиметар аваз акьалтIарна. И йисара Осман шегьердин «Чемпион» клубда женгинин самбодал, къайдаяр авачир женгерал, каратэдал ва кукIунрин маса жуьрейрал рикIивай машгъул хьана.
Лап секин къилихрин, гьатта за гайи суалризни кагьулдаказ жавабар гузвай жегьил итимди зи вилик гъана эцигай кьван грамотаяр, дипломар ва 20-дав агакьна медалар акурла, зун инанмиш хьана хьи, Осман Гьажимусаев чемпионрин чемпион я. И гафарин гьахълувал къалурун патал заз агъадихъ Осман Гьажимусаева къазанмишнавай са шумуд тIвар кьаз кIанзава.
Армейский рукопашный бойдай, къайдаяр авачир женгерай, грэпплингдай Дагъустан Республикадин чемпион, каратэ будо-кайдай Кеферпатан Кавказдин федеральный округдин чемпион, Пеньза шегьерда алай йисан мартдин вацра Россиядин самооборонадин комбат федерациядин кIвенкIвечивал патал тухвай акъажунрин гъалибчи, женгинин самбодай Россиядин ачух милли 2-чемпионатдин чемпион, кьве сеферда дуьньядин Кубокдин сагьиб…
Аферин ва баркалла кьегьал лезги хциз!
Спортдин са шумуд жуьредай РФ-дин спортдин мастервиле кандидат тир Осман Гьажимусаеваз, Тоскано шегьерда дуьньядин чемпионатда гъалибвал къачуниз килигна, женгинин самбодай РФ-дин спортдин мастервилин дережа ганва.
Алай вахтунда «Юждаг» университетдин студент тир Осман Гьажимусаевахъ кIелуна ва спортда мадни чIехи агалкьунар хьун чи мурад я.
Хазран Кьасумов.
Шикилда: О. Гьажимусаев.
