«Сулейман-Стальский район» муниципальный райондин Кьил Нариман Шамсудинович Абдулмуталибова алатай гьафтеда вичин кабинетда, уьмуьрдин 60 йис тамам хьунихъ галаз алакъалу яз, администрациядин крар идара ийизвайди тир Рамазан Абдулалимович Абдулазизовав вичин къул алай Чухсагъулдин чар вахкана.
Администрациядин управленийринни отделрин начальникар, къуллугъринни общественный тешкилатрин руководителар кIватIнавай гуьруьшдал Н. Ш. Абдулмуталибова лагьайвал, Рамазан Абдулалимович районда регьбервал гудай къуллугърал яргъал йисара кIвалахзавай, хиве авай везифаяр намуслудаказ кьилиз акъудзавай, дерин чирвилер авай, тешкилатчивилин рекьяй алакьунар авай инсан, хъсан общественник я.
-За Рамазан Абдулалимовичаз 60 йис тамам хьун райондин депутатрин Собранидин, администрациядин ва кьилди жуван патай рикIин сидкьидай мубаракзава, - давамарна Нариман Шамсудинович Абдулмуталибова. – Адахъ мягькем сагъламвал, хзандин бахтлувал, руьгьдин гьуьндуьрвал, райондин экономика мягькемарунин карда ва кIвалахда мадни еке агалкьунар хьун зи мурад я.
Юбилярдиз тебрикдин хуш келимаяр гуьруьшдал райондин администрациядин Кьил Штибег Гьажимегьамедович Мегьамедханова, адан I-заместитель Лацис Абидинович Оруджева, заместитель Саид Мусинович Темирханова ва маса юлдашрини лагьана.
