Дагъустандин халкьдин шаир СтIал Сулейманан ва гзаф маса шаиррин ватан тир Агъа СтIалрин хуьруьз гьахълудаказ шииратдин «Мекке» лугьузва. Мукьвара и хуьряй тир Рамазан Дадашева Кьасумхуьрел кардик квай «Куьредин ярар» медениятдин центрадин типографияда вичин сифтегьан ктаб чапдай акъудна. Ктабдиз ажайиб тIвар ганва: «Зунни я, дуст, шииратдин «Меккедай».
Вуж я Рамазан Дадашев? Ам 1948-йисуз Агъа СтIалдал Ватандин ЧIехи дяведин иштиракчи гвардиядин майор Гьажимегьамед Къазимегьамедован хзанда дидедиз хьана. Ада 1968-йисуз Дербентдин педучилище, гуьгъуьнлай Дагъустандин госуниверситетдин филологиядин факультет акьатIарна, 1976-йисалай инихъ хайи хуьруьн юкьван школада чIаланни литературадин муаллимвиле, директордин заместителвиле кIвалахна. РФ-дин халкьдин образованидин отличник, Дагъустан Республикадин лайихлу муаллим тир Рамазан Дадашев алай вахтунда лайихлу пенсияда ава.
- Зун, стха, гъвечIи чIавалай гьикаяяр, шиирар кхьинал машгъул кас я, - лугьузва Рамазан Дадашева. – Зи гзаф эсерар газетриз, журналриз акъатайди я. Гила, абур санал кIватIна, за ктаб акъуднава. Гьич тахьайтIа, зун агъастIалви я, шиирар кхьин тийидай агъастIалви жедани?!
Р. Дадашева, эпиграф яз, ктабдин сифте чина кхьенва: «Садни хазвач шаирар яз бинедай, зунни я, дуст, шииратдин «Меккедай».
Ктабда юмордин гьикаяяр ва шиирар, гьакIни жуьреба-жуьре йисара «Лезги газетдиз» акъатай макъалаяр («КIела, кIела, мадни кIела!» 1971-йис, август. «Девирдин тIалар». 1997-йис, апрель ва масабур) гьатнава.
Ингье, за ктабдай Р. Дадашеван «Пуд лимон», «Дустарин ихтилатар», «Къаридин хинкIар», «Са ятур адаз тур», «ЦIегьрен аламат», «Лам ятIани, гьайван я», «ХинкIар» ва маса юмордин гьикаяяр кIелзава. Айгьам, хъвер хас я автордиз. Эсерра чи йикъара кьиле физвай вакъиаяр, мадни дуьз лугьун хьайитIа, ришветбазвал, дасмалчивал, «кьве чин хьун» негьзава, гьахьтин вакъиайрин «игитар» русвагьзава. Зун гъавурда акьазва, вичи саки 40 йисуз школада муаллимвиле кIвалах авур, акьалтзавай несилдиз тербия гайи касдиз муьфтехурар, чалкечирар, ришветбазар хуш туш.
Рамазан Дадашеван цIийи ктабдин кьвед лагьай пай шииррикай ибарат я. «Кьилиз акъатдач чIуру ниятар», «Свасни къари дуст хьайила», «Кьисмет тахьуй ахьтин инсан хзандиз», «Бес мус хьурай идан эхир», «Классда» шиирра айгьам, хъвер ава.
Лезги литературадин устадар тир Абдулкъадир Сайдумоваз, Шагь-Эмир Мурадоваз, Майрудин Бабахановаз, Сажидин Саидгьасановаз бахшнавай шиирра дерин мана, чIалан къешенгвал, везинлувал ава.
88 чин аваз чапдай акъатнавай ктабдин тираж 300 экземпляр я. Ам кIелзавайбуру еке хушвилелди кьабулдайдал шак алач.
Хазран Кьасумов, ЛПС-дин райотделенидин секретарь.
