- Райондин экономика мягькемарунин, хуьруьн майишат вилик тухунин, гьасилзавай продукциядин кьадар артухарунин карда чна карханайра, зегьметчи коллективра жуьреба-жуьре къайдаяр ишлемишзава, - лагьана чаз «Сулейман-Стальский район» муниципальный райондин хуьруьн майишатдин ва суьрсетдин отделдин начальникдин заместитель Гьамидин Абдулкъафарова. – Кьилди къачуртIа, тежрибади къалурзавайвал, хуьруьн чкада арендадин къайда менфятлу я. Гьавиляй районда чилин участокар кьуна кIвалахзавай арендаторрин кьадар 960 касдилай виниз я. Гзафбурухъ кIвалахда агалкьунар жезва.
Мукьвара чун гьакъисагъвилелди зегьмет чIугвазвай арендатор Г. Насрулаеван патав Агъа СтIалрин «Паласа» участокдиз фена. Адахъ 20 гектар машмашин, 5 гектар шефтелрин, алатай йисуз кутунвай 10 гектар пIинидин ва 3 гектар хутун багълар ава. Мал-къарадикай хуьн патал элкъвена сетка яна кIевирнавай багълар чешнелу гьалда ава. Чаз акурвал, жегьил багъда жергейрин араяр цанва, къелемрин пунариз пер янава, ятар ганва.
- Багълар кутадай къелемар за чкадал гьазурзава, - лугьузва тежрибалу багъманчиди.
Чаз малум хьайивал, алай йисуз Г. Насрулаева районда тухвай «Лап хъсан багъманчи» конкурсда иштиракна, ана 2-чка кьур адаз Дагъустан Республикадин хуьруьн майишатдин министерстводин ва райондин администрациядин Гьуьрметдин грамотаяр гана.
Алай йисан бегьер патал Г. Насрулаева 40 гектарда къуьлни цанва. Арендаторди чаз лагьайвал, анрай цIи 100 тонндилай тIимил тушиз техил кIватI хъувун гуьзлемишзава.
Идалайни гъейри, арендаторди вичин участокда помидорар, афнияр, гьажибугъдаярни гьасилзава.
