Малум тирвал, 2008-йисалай эгечIна Россиядин Федерацияда гьар йисуз 8-июль хзандин, муьгьуьббатдин ва вафалувилин Югъ яз къейд ийизва. Идахъ галаз алакъалу яз чеб яргъал йисара рикIерни сирер сад авуна, арада михьи муьгьуьббат, гьуьрмет-хатур аваз яшамиш хьайи, гзаф аялар хана, тербияламишна, уьмуьрдин шегьредал акъудай хзанриз «Муьгьуьббатни вафалувал хьунай» гафар кхьенвай медалар гузва. Алай йисуз чи райондай ихьтин медалриз Агъа СтIалрин хуьряй тир Селим ва Жарият Муслимоврин ва КIварчагърин хуьряй тир Саржан ва Зинаида Алимбалаеврин хзанар лайихлу хьана. Медаларни абурув, тебрикдин келимаяр лугьуналди, «Сулейман-Стальский район» муниципальный райондин Кьил Нариман Шамсудинович Абдулмуталибова вахкана.
Шадвилин и мярекатда гьакIни райондин администрациядин Кьилин заместитель Саид Темирханова, УСЗН-дин начальник Жавидин Бремова, информациядин агентстводин начальник Жабраил Асланова, чкадин массовый информациядин такьатрин векилри иштиракна.
Гуьруьшдал Селим ва Жарият Муслимоври, Саржан ва Зинаида Алибалаеври чпин уьмуьрдин ва зегьметдин рекьерикай, веледрикай, хтулрикай маракьлу ихтилатар авуна.
Малум хьайивал, Селим ва Жарият Муслимоври яргъал йисара производствода, Саржан ва Зинаида Алибалаеври 50 йисалай виниз муаллимвиле гьакъисагъвилелди зегьмет чIугуна.
Муслимоврин хзанда 6 велед, 12 хтул, 5 птул, Алибалаеврин хзанда 8 велед, 22 хтул ва 14 птул ава. Абурун хзанра алимар, чIехи дережайрин руководителар ава.
РФ-дин Президент В. Путинан Указдалди мукьвара Муслимоврин чIехи гада тир, РФ-дин ФСКН-дин Дагъустанда авай Управленидин начальниквиле кIвалахзавай Энрик Селимовичаз полициядин генерал-майорвилин чин ганва.
- Чи дуст, районэгьли, халкьдин лайихлу хва Энрик Селимовичаз ганвай чин чна Муслимоврин хзандиз, мукьва-кьилийриз рикIин сидкьидай мубаракзава ва чна и кардал дамахзава, - лагьана Н. Ш. Абдулмуталибова.
Гуьруьшдал ихтилатар, рикIел хкунар, тебрикар гзаф хьана ва мярекат са сятдилай гзаф вахтунда давам хьана.
Муслимоврин ва Алибалаеврин хьтин гьуьрметлу хзанар къадим Куьреда мадни гзаф хьурай!
Текст кхьейди ва шикил ягъайди Хазран Кьасумов я.
